Sesaun plenária iha Parlamentu Nasionál. Imajen/Dok.TATOLI

DILI, 23 jullu 2019 (TATOLI)–Parlamentu Nasionál (PN) liuhosi sesaun plenária, tersa ne’e, aprova ona Proposta Rezolusaun nú. 2/V (1a)-Ratifikasaun Tratadu  entre Repúblika Demokrátika Timor-Leste (RDTL) no Austrália, ne’ebé estabelese respetiva Fronteira Marítima iha Tasi Timor ho votu a-favór 42, kontra 23 no abstensaun 0.

Prezidente Parlamentu Nasionál (PPN), Arão Noé de Jesus da Costa Amaral, hateten Bankada FRETILIN ne’ebé desidi atu vota kontra ne’e direitu ida-idak ninia.

“Diferensia votu hanesan prosesu normál iha demokrasia, tanba ita-nia prinsípiu demokrátiku mak ita-nia Repúblika deklara kedas ho naran Repúblika Demokrátika Timor-Leste. Tanba ne’e, direitu partidu no bankada, deputadu ida-idak nia direitu,” PPN fó komentáriu iha plenária, hafoin halo votasaun iha finál globál.

Aleinde ne’e, Ministru Estadu Prezidénsia Konsellu Ministru no Ministru Petróleu no Rekursu Minerál en-ezersísiu, Hermenegildo Augusto Cabral Pereira informa bainhira laiha aprovasaun, promulgasaun no publikasaun ba diploma legál Governu ne’ebé kompostu husi Lei no Dekretu-Lei, mak sei labele prosede Ratifikasaun Tratadu.

“Obrigasaun internasionál sira ne’ebé asumi ona husi Timor-Leste, hanesan aneksu ba Ratifikasaun Tratadu no troka korrespondénsia klaru ona katak tratadu só bele tama iha vigór hafoin asegura kondisaun ekivalente liuhosi aprovasaun husi diploma sira,” nia tenik

Nia hatutan, aprovasaun diploma hirak ne’e konstitui presupostu legál no kondisaun ba asinatura kontratu atu fahe produsaun ne’ebé tenke vigór, iha loron hanesan tratadu tama iha vigór. Nune’e mós kontratu anteriór lisensa sira vigora imediatamente hafoin tama tratadu vigór.

“Austrália konsistente iha pozisaun, alias aliña ho obrigasaun ne’ebé asumi ona husi Estadu Timor-Leste no Austrália liuhosi tratadu no troka korrespondénsia, ne’ebé la prosedera ratifikasaun, enkuantu Timor-Leste la aprova diploma nesesáriu atu asegura kondisaun ekivalente,” nia akresenta.

Iha parte seluk, Xefe Bankada FRETILIN, Aniceto Guterres liuhosi deklarasaun votu hateten FRETILIN vota kontra ho razaun  Tratadu Fronteira Marítima ne’ebé PN aprova dadauk ne’e loke dalan ona atu fahe rekursu ho gratuita ba viziñu sira. 

“Bankada FRETILIN kestiona konteúdu balun husi Tratadu Fronteira Marítima ne’ebé inklui ona fahe rekursu ho Austrália. Bankada FRETILIN hakarak mós kestiona tanbasá mak tratadu la inklui kedas katak kadoras ka pipeline atu mai Timor-Leste. Se Tratadu Fronteira Marítima ne’e defini katak kampu Greater Sunrise tomak iha Timor-Leste nia fronteira laran, tanbasá mak Tratadu ida ne’e inklui ona partilla rekursu sira?,” kestiona deputadu ne’e.

Enkuantu, Xefe Bankada CNRT, Duarte Nunes fó parabéns ba esforsu tomak ne’ebé VIII Governu Konstitusionál halo no fó fiar ba Negosiadór Prinsipál ba Delimitasaun Fronteira Marítima, Kay Rala Xanana Gusmão ho ninia ekipa.

Xefe Bankada PLP, Francisco de Vasconcelos hateten PN hanesan órgaun soberanu  RDTL ne’ebé reprezenta timoroan tomak, nune’e iha kbiit hodi halo lei atu fiskaliza no halo desizaun polítika iha uma fukun, hodi defende Timor-Leste nia soberanu.

“Bankada PLP manifesta no afirma tan katak delimitasaun Fronteira Marítima ho Austrália konsidera hanesan aktu afirmasaun soberanu parte territória Timor-Leste nian, tanba troka nota diplomátika hodi konfirma ratifikasaun tratadu tama iha vigór iha loron istóriku loron 30 agostu,” nia realsa.

Deputada Bankada PD, Mariano Assanami Sabino apresia ba ekipa ne’ebé halo esforsu maka’as hodi to’o iha prosesu Ratifikasaun Tratadu Fronteira Marítima.

“PD apresia ba ekipa Timor GAP no Autoridade Nasionál Petróleu no Minerál (ANPM) ne’ebé mesak ema foinsa’e maibé fó apoiu tomak ba Xefe Negosiadór, Kay Rala Xanana Gusmão no ohin bele realiza diskusaun,” tenik Assanami.

Deputadu Bankada KHUNTO, António Vedial konsidera alterasaun Pakote Lejislzlativa tenke halo nu’udar efeitu husi rede markasaun Fronteira Marítima, hafoin negosiasaun naruk no lori malu to’o meza konsiliasaun obrigatótiu no ikus mai rikusoin ne’ebé durante ne’e fahe ho Austrália sei pertense mai RDTL. 

Xefe Bankada UDT/FM, Gilman Exposto dos Santos agradese ba VII no VIII Governu ne’ebé involve hotu prosesu asina Delimitasaun Fronteira Marítima to’o ohin loron, nune’e mós nia fó apoiu tomak ba instituisaun sira ne’ebé involve iha prosesu ne’e.

“Hakarak fó apoiu tomak ba Timor Gap no ANPM atu kontinua serbisu ho responsabilidade tomak ba dezenvolvimentu ita-nia rikusoin iha Tasi Timor, hodi hatudu ba ita hotu no Povu Timor-Leste ita boot sira nia responsabilidade. Ha’u fiar ita bot sira bele,” nia tenik.

Nune’e mós, Xefe Bankada PUDD, António de Sá Benevides hateten onra no orgullu boot ba PUDD nu’dar bankada no partidu foun iha PN maibé bele hola parte iha diskusaun  no votasaun ba Tratadu Fronteira Marítima.

“Diskusaun no votasaun ida ne’e ba vitória Timor-Leste, hanesan istória ida ne’ebé ita labele haluha,” nia afirma.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here