Ministru Obra Públika, Salvador Eugénio Soares dos Reis Pires (loos) no Diretór Jerál MOP, Rui Hernani (karuk). Foto/mídia MOP.

DILI, 23 jullu 2019 (TATOLI)-Ministériu Obra Públika (MOP) hein relatóriu husi ekipa Gabinete Primeiru-Ministru (GPM) ba avaliasaun projetu 143, hafoin bele prosesa pagamentu.

Diretór Jerál Ministériu Obra Públiku, Rui Hernani, hatete kona-ba projetu 143 ne’ebé iha ona dokumentu kontratasaun ou obra la’o, inklui iha progresu, Governu tenke selu.

“Mas, projetu 143 ne’e mós tuir loloos osan iha hotu ona no disponivel atu selu, maibé Oitavu Governu hakarak hala’o prosesu ida ne’ebé maka ema hotu-hotu tenke simu”, Diretór Rui Hernani, afirma iha faról, ohin.

Husi projetu 143, nia dehan, 98 mak iha ona kontratu no obra ne’e la’o hela ho progresu di’ak, nune’e hein halo pagamentu. Enkuantu, projetu 45 mak laiha kontratu, maibé iha dezembru tinan kotuk husi númeru ne’e aprova ona projetu 15 tanba hirak ne’e nia karater urjénsia ne’ebé mak aprezenta husi Ajénsia Dezenvolvimentu Nasionál (ADN), Komisaun Nasionál Aprovizionamentu (CNA, sigla portugés) no Konsellu Administrasaun Fundu Infraestrutura (KAFI).

Hernani dehan ba projetu sira ne’e, iha Oitavu Governu tau ona iha rubrika Orsamentu Jerál Estadu atu halo pagamentu.

“GPM mak sei forma komisaun ida hodi hala’o averiguasaun (investigasaun) ba pakote sira ne’ebé la’o hela no laiha kontratu hodi aprezenta fila ba Primeiru-Ministru atu foti desizaun hodi MOP bele hala’o pagamentu”, tenik.

Tanba ne’e, nia dehan MOP sei hein hela ekipa husi Gabinete Primeiru-Ministru (GPM) halo levantamentu no avaliasaun ba projetu 143.

Ekipa ne’ebé GPM estabelese ne’e envolve MOP, Ministériu Planeamentu, Investimentu no Estratéjiku (MPIE), ADN, no KAFI hodi fasilita Governu halo desizaun ba pagamentu.

Antes ne’e, Parlamentu Nasionál liuhusi pedidu Bankada FRETILIN submete rekerimentu inkéritu parlamentár atu estabelese Komisaun Inkéritu Parlamentár (KIP) ba projetu 143 ho montante osan millaun $345 ne’ebé KAFI aprova iha loron 19 jullu 2017.

Hafoin KIP konklui relatóriu, maibé la konsege aprova iha Parlamentu Nasionál, tan ne’e Oitavu Governu Konstitusionál foti desizaun hodi halo verifikasaun rasik ba projetu 143 refere.

http://www.tatoli.tl/2019/04/governu-kontinua-selu-projetu-143/

Jornalista : Florêncio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here