Sekretáriu Estadu Juventude no Desportu, Nélio Isaac Sarmento. Imajen Tatoli/ Egas Cristóvão

DILI, 23 jullu 2019 (TATOLI)–Sekretáriu Estadu Juventude no Desportu (SEJD), Nélio Isaac Sarmento afirma, Liga Futeból Amadora (LFA) foin la’o iha natureza non-profisionál. Tanba ne’e, LFA hala’o atividade labele ezije klube sira hatama osan.

Nélio hato’o lia hirak ne’e bazeia ba informasaun ne’ebé durante ne’e nia assesu iha mídia relasiona ho rejistrasaun ne’ebé LFA hala’o ba klube foun hirak ne’ebé hakarak partisipa iha jogu Terseira Divizaun tenke kontempla administrasaun ho osan rihun rua atus-lima ($2500) ba kada klube.

“Órgaun LFA tenke halo atividade. Labele ezije ema atu kontribui osan. Atividade tenke la’o nafatin. Realidade iha terenu ita halai sees tiha fali hosi natureza loloos Liga Futeból Amadora (LFA) ninian. Maibé, ida ne’e ha’u lakohi impoin polítika ruma Governu nian ba desizaun hirak ne’ebé LFA hasai ona,” tenik Nélio ba Agência Tatoli iha nia kna’ar fatin, Lecidere, ohin.

Governante ne’e husu órgaun LFA iha futuru hala’o atividade tuir situasaun ne’ebé iha, katak tenke sukat kondisaun klube ida-idak nian to’o iha ne’ebé.

“Ha’u hein katak iha prosesu tuir mai bainhira LFA hala’o nia asembleia, asuntu hirak hanesan ne’e bele lori ba asembleia para diskute atu haree loloos natureza LFA nian. Nune’e, bele ajuda mós ita-nia joven hirak ne’ebé iha talentu di’ak maibé sira rasik laiha kbiit atu hetan oportunidade,” katak Nélio.

Ema númeru ida iha SEJD ne’e realsa katak LFA tenke iha hanoin ne’ebé luan uituan oinsá mak bele involve klube sira iha suku no bairu hirak ne’ebé hakarak tebes involve iha Liga maibé orsamentu la sufisiente.

Entretantu, antes ne’e, LFA liuhosi Diresaun Verifikasaun no Lisensa loke ona oportunidade ba klube hotu atu bele partisipa iha jogu Terseira Divizaun ne’ebé sei hala’o iha tempu besik. Hosi rejistrasaun ne’e, klube 14 mak konsege rejistadu ona atu partisipa iha jogu refere.

Klube hirak ne’e mak hanesan FC Pacífico Aileu, FC Kuda Ulun Bobonaro, YMCA FC, AD Maubisse, FC Imanuel, FC Irmãos Unidos, AS Lero, ADR União, FC Karau Fuik, AS Inur Transformação de Futeból, FC Laleia United, AS Marca Futeból Klube, AS DE Klube Mamura-ACM no FC Liquiçá.

Jornalista: Hortencio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here