Jogadór estranjeiru ne’ebé sei reforsa klube Karketu Dili FC. Imajen Mídia Karketu Dili FC

DILI, 23 jullu 2019 (TATOLI)–Relasiona ho Liga Futeból Amadora (LFA) fó ona oportunidade ba klube ualu ne’ebé hamahan-an iha Primeira Divizaun hodi halo transférensia ba jogadór tuir nesesidade ida-idak nian, mak Karketu Dili FC uza oportunidade ne’e hodi kontaktu jogadór estranjeiru haat hosi Brazíl no Gana.

Razaun kontratu jogadór estranjeiru, tuir ofisiál Karketu FC, tanba pozisaun klube zigante kapitál Dili ne’e nia prestasaun tún iha jogu époka ida ne’e.

“Públiku hatene, dadaun ne’e, Karketu iha pozisaun ikus liu iha tabela klasifikasaun. Tanba ne’e mak janela transferénsia ne’ebé loke ona, mak ami hakarak hadi’a fali ami-nia ekipa, entaun ami halo kontratu ho jogadór haat hosi estranjeiru,” tenik Ofisiál Karketu Dili FC, Eliseu Isaac ba Agência Tatoli iha edifísiu Federasaun Futeból Timor-Leste (FFTL), Bairru Formosa, tersa ne’e.

Nia haktuir, jogadór haat ne’e sei to’o iha Timor-Leste iha semana oin no jogadór rua hosi Brazíl mak sei to’o uluk.

Jogadór brazileiru na’in rua ne’e mak Paulo César no Nicson Mendes, ne’ebé sei joga iha avansadu, enkuantu hosi Gana mak Obe Ansa, ne’ebé hanesan mós eis Selesaun Nasionál Gana sei joga iha defeza no Alex Aria sei joga iha pozisaun médiu no avansadu.

“Agora dadaun ami submete ona sira-nia dokumentu ba Liga Futeból Amadora (LFA) no Federasaun Futeból Timor-Leste,” dehan Eliseu.

Alende ‘fihir’ jogadór estranjeiru,  Karketu Dili FC mós sei buka tan jogadór lokál balun, liliu iha parte defeza no parte klaran.

Antes ne’e, Karketu Dili FC rekruta ona jogadór Trio Papua, maibé ladún hatudu prestasaun di’ak no iha jogu primeira volta nia klaran Karketu tenke husik.

Jornalista: Hortencio Sanchez

Editór: Xisto Freitas 

HAKEREK NO HATÁN

Please enter your comment!
Please enter your name here