Xanana ho Wiranto kaer liman hafoin asina nota prinsípiu aseitasaun ba segmentu ne'ebeé seidauk rezolvidu kona-ba fronteira terrestre TL-RI. Nota ne'e asina iha Jakarta, Segunda (22/07/2019). Imajen/Embaixada TL iha Indonézia

DILI, 22 jullu 2019 (TATOLI)—Enkontru entre Negosiadór Prinsipál Fronteira Timor-Leste, Kay Rala Xanana Gusmão ho Ministru Koordenadór ba Asuntu Polítika Justisa no Defeza Repúblika Indonézia, Wiranto no Ministra Negosia Estranjeiru Repúblika Indonézia, Retno Marsudi, ohin, iha Edifísiu  Ministériu Koordenadór ba Asuntu Polítika Justisa no Defeza, iha Jakarta, la’o ho susesu no di’ak, hodi hateke ba oin no aprofunda relasaun maun-alin ho pás entre povu rai rua.

Xanana ho Wiranto asina nota prinsípiu aseitasaun ba segementu n’ebé seidauk rezolve kona-ba fronteira terrestre, Segunda (22/07/2019). Imajen/Embaixada TL iha Indonézia

Hafoin enkontru ne’e, Ministru Koordenadór ba Asuntu Polítika Justisa no Defeza Repúblika Indonézia, Wiranto, lia tun ba jornalista sira katak, enkontru ne’e trasa kleur tiha ona tanba importante tebes ba nasaun rua (Repúblika Demokrátika Timor-Leste ho Repúblika Indonézia) no Wiranto afirma tan, katak Xanana nia prezensa iha enkontru ne’e hanesan Reprezentante Espesiál no Xefe Negosiadór Prinsipál Fronteira Timor-Leste.

Delegasaun Timor-Leste ne’ebé lidera husi Kay Rala Xanana Gusmão to’o iha Edifísiu  Ministériu Koordenadór ba Asuntu Polítika Justisa no Defeza, tuku 4.08 lokraik, Oras Indonézia (WIB-sigla Indonézia)    hodi tama direita ba hasoru Wiranto, ne’ebé la liu minutu balun, tuir kedas ho prezensa Ministra Negósiu Estranjeiru Repúblika Indonézia nian, Retno Marsudi.

Konferensia Imprensa konjunta entre Xanana ho Wiranto iha Jakarta, Segunda (22/07/2019). Imajen/Embaixada TL iha Indonézia

Liuhosi konferénsia imprensa konjunta ne’ebé akompaña mós husi Kay Rala Xanana Gusmão, Ministra Retno Marsudi, Embaixadór Alberto X.P. Carlos,  no ekipa tékniku husi TL ho RI, Ministru Wiranto klarifika katak,  iha enkontru ne’e fó hanoin fali, mezmu iha pasadu, rai rua iha konflitu, maibé iha tiha ona kompromisu hodi haluha pasadu no hateke ba futuru ho pás.

“Iha pasadu,  ita iha konflitu no ita promete atu haluha pasadu nian hodi hateke ba futuru ho fundamentu relasaun maun-alin no pás ne’ebé eterna (abadi).  Bazeia ba fundamentu ne’e mak ita rezolve ona kestaun fronteira terrestre Indonézia ho Timor-Leste. ohin ita asina nota prinsípiu de aseitasaun ba segmentu ne’ebeé seidauk rezolvidu,” hateten Wiranto ho lian Indonézia ba jornalista sira ne’ebé TATOLI asesu video konferénsia imprensa nian husi Embaixada Timor-Leste iha Indonézia.

Wiranto mós sekunda ho afirmasaun balun  ka slogan hosi Xanana dehan, ‘lais liu di’ak liu’(lebih cepat, lebih baik) no Wiranto friza hikas katak, agradese tebes  tanba, ohin, TL ho Indonézia hakat dook liu ona hodi buka rezolve segmentu ne’ebeé seidauk rezolvidu no fó mandatu ikus liu ba seniór official’s consultation no ekipa teknika hodi rekolla pontu koodenadu iha area segmentu ne’ebeé seidauk rezolvidu ba preprasaun addendum nu.2 , inklui tratadu finál  fronteira terrestre Indonézia ho Timor-Leste.

Wiranto informa katak, finaliza tiha akordu  fronteira terrestre, liu-liu fatin hirak ne’ebé sei sai kategoria  seidauk rezolvidu,  maka tempu ona hakat ba negosiasaun fronteira marítima entre rai rua.

“Sasán hotu kona-ba  tékniku nian sei arranja ho didi’ak hodi bele fasilita negosiasaun la’o ho di’ak hodi kontinua ba diskusaun substansiál tuir mai,” hateten Wiranto.

Okaziaun ne’e, Xanana hateten, lori governu Timor-Leste no povu Timor-Leste nia naran hato’o agradesimentu boot ba Ministru Wiranto ho Ministra Retno Marsudi, ba oportunidade di’ak ida ne’e, hodi ko’alia no konkorda rezolve daudaun kestaun fronteira terrestre nian.

“Ha’u foin dehan, lais liu, di’ak liu, hanesan Ministru Wiranto haktuir, ‘lebih cepat lebih baik’ tanba prosesu negosiasaun ne’e ita hein kleur tebes. Ita nia prinsípiu relasaun maun-alin no  harii pás mak importante duni ba ita. Obrigadu barak,” hateten Xanana Gusmão, hodi fila kedas ba hakuak Ministru Wiranto no rei Ministra Retno Marsudi nia liman.

Kontribuisaun           : Embaixada TL iha Indonézia

Edisaun                      : Francisco Simões

3 KOMENTÁRIU

  1. PARABENS, PARABENS, PARABENS MAUN BOOT, MAROMAK SEMPRE AJUDA HODI MANAN BUAT HOTU KONA BA RDTL ALELUYA adeus hakuak boot

HAKEREK NO HATÁN

Please enter your comment!
Please enter your name here