Diretór Ezekutivu ANAAA, Edmundo da Silva Viegas. Foto: UNILAB

DILI, 22 jullu 2019 (TATOLI)—Diretór Ajénsia Nasionál Avaliasaun Akreditasaun Akademika (ANAAA), Edmundo da Silva Viegas, hateten, se kada tinan ANAAA hetan apoiu fundu finanseiru $500.000 mak programa prioridade 187 kona-ba avaliasaun kursu iha Instituisaun Privada no Publiku ne’e ramata ona 2016.

Programa prioridade hamutuk 187 atu halo avaliasaun no estudu ba kursu instituisaun ensinu superiór sira ne’e, ANAAA trasa para  ajuda instituisaun sira bele hadi’a kualidade. Maibé, se fundus finanseiru sufisiente entaun programa sira ne’e sei konklui iha 2019 to’o 2020.

“Avaliasaun ba programa prioridade 187 ne’e, halo ba iha institutu privadu no publika sira ne’e. Tinan kotuk, avaliasaun ne’e foin mak realiza programa 69. Tinan ne’e, ita konsege atinji programa 53. Agora purvolta programa 60 mak seidauk hala’o. Tuir planu sei kontinua fali ba tinan oin,” dehan Diretór ANAAA, Edmundo Viegas, ba Ajénsia TATOLI liuhusi entrevista iha nia knaar fatin, Matadoru, Dili, segunda (22/7/2019).

Edmundo hatutan, se programa sira ne’e mak realiza iha tinan ida ne’e entaun tinan oin ANAAA bele lansa ona Panorama Globál Ensinu Superior nian em termos de kualitativa iha nível instituisaun no programa  instituisaun sira nian to’o  iha ne’ebé ona ba publiku, liuhusi aniversáriu ezisténsia ANAAA nian ba tinan 10.

Maibé, tuir nia, iha tinan 2020 mak ANAAA atinji programa 187 ne’e entaun sei inklui mós kona-ba kursu maestradu balun. Tanba dentru programa inisiál ne’ebé iha, ANAAA mós iha 127 kona-ba gradusaun ba maestrado sira. Ne’eduni kuandu kursu sira ne’e bele kompleta ona siklu formasaun ida.

“Ami hakarak interven iha formasaun sira ne’e  atu publika ba publiku atu hatene ho di’ak kona-ba  formasaun nivel maestradu no lisensiatura ne’e, kumpri duni rekezitu kualidade ka lae,” nia hateten.

Purtantu, nia dehan, husi rezultadu avaliasaun sira ne’e hotu, Ministériu Ensinu Superiór Siénsia Kultura (MESSK) ne’ebé tutela no superintendénsia ba ANAA mak sei foti dezisaun polítika ida adekuada para bele  hakbiit liután kapasidade atu bele kuda, haburas no hametin liután idaidak ninia instituisaun.

“Ha’u espera katak instituisaun idaidak bele tane aas kualidade ne’e hanesan kultura ida. Aproveita dezisaun polítika MESSK nian ne’e para bele produs liután graduadu ho kapasidade no abilidade aas no di’ak liu hodi enfrenta mundu ohin loron ne’ebe globalizadu,” nia espera.

Notísia relevante: http://www.tatoli.tl/2019/07/anaaa-akredita-ensinu-superior-11-departamentu-55-hetan-c/

Jornalista: Tome Amado

Editór      : Rafy Belo

HAKEREK NO HATÁN

Please enter your comment!
Please enter your name here