Eurico Guterres halo intrevensaun iha sidadaun sira-nia leet. Foto: Google news

DILI, 22 jullu 2019 (TATOLI)—“Ha’u fiar katak UNAMET la neutru. Pro-independénsia bele manan maibé laos dehan katak ha’u ho ha’u-nia belun sira atu hamutuk ho sira. Ita sei halo ajenda katak ema ne’ebé moris iha nasaun foun labele xateia ema ne’ebé moris iha nasaun tuan” (Vise Panglima Pejuang Integrasi (PPI) no Komandante Milísia Aitarak, Eurico Guterres).

Tuir mai, atu refleta akontesimentu sira ne’ebé akontese iha Konsulta Populár 1999 no  Komemorasaun Konsulta Populár ba dala-20 (30 Agostu 1999-30 Agostu 2019) ne’e, Ajénsia TATOLI lori sani-na’in sira akompaña hikas entrevista (dadalia) husi jornalista GAMMA, Bersiah Lubis dan Rubai Kadir, ho Vise Panglima Pejuang Integrasi (PPI) no Komandante Aitarak (milisia pro-integrasaun), Eurico Guterres, Segunda (30 Agustus) no sábadu (04 setembru 1999).

Xanana “Yes”, UNAMET “No”!

Oin nusá Ita-boot haree situasaun seguransa iha tempu Konsulta Populár?

Ha’u hare situasaun nakonu ho amizade entre grupu pro-integrasaun no antiintegrasaun. Loloos ne’e, povu kiik-oan la sai problema. Ida sai problema ne’e maka elite polítika ne’ebé hamrook ba pozisaun. Sira lori povu la’o tun sa’e’ de’it, too ikus povu maka terus. Hafoin ne’e, sira ne’e la’o husik hela povu.

Tanba ne’e, Ita-boot haree elite polítika se maka iha ne’e. Tanba ne’e, ha’u dehan blokeia aeroportu no pontikais ho dalan husi rai maran atu nune’e sira labele sai husi Timor-Timur. Sira tenke responsabiliza. Labele dehan de’it hili autonomia ka hili ukun rasik-an hafoin ba ona. Agora, Ita-boot haree elite polítika se maka iha ne’e. Sira só tuir Konsulta Populár iha Lisboa, Austrália, Jakarta no Bali. Lolos ne’e, iha ne’e, hamutuk ho povu? Buat ne’ebé ita haree, akontese elit polítika ne’ebé iha rai li´ur mai iha ne’e povu lakohi atu simu sira.

 Sé-sé de’it maka sei blokeia atu labele sai husi Dili?

(Nia lakohi temi nia naran) loloos ne’e, ha’u lakohi atu akontese tan esperiénsia daruak funu entre maun-alin (funu sivil) akontese hanesan uluk. 

Sira-nia responsabilidade ne’e oinsa los?

Sira tenke labele sai ba li´ur iha kondisaun sá de’it. Sira tenke nafatin iha ne’e. Se hakarak moris ka mate tenke hamutuk nafatin ho povu. Labele, hafoin ne’e moris di’ak iha ne’ebá. 

Ita-boot satisfas ho Konsulta Popular ne’e hala’o?

Ha’u sente kmaan tanba hotu ona iha loron ohin. Tanba solusaun ba problema Timor-Timur atu ramata, no iha 31 (Agustus 1999) ami sei harii komisaun atu ko’alia Timor-Timur nia futuru to’o rekonsiliasaun Dare III ne’ebé tuir planu sei hala’o iha Flores (NTT). Ninia membru 15 husi pro-integrasaun no pro-independénsia ema 15 mós. Ha’u rasik la tuur iha komisaun ne’e, maibé ha’u delega Joanico, Komandante Setór A ne’ebé hela iha Baucau (só ke ikus-ikus ne’e grupu pro-autonomia rezeita tuur iha komisaun refere, red.) 

Horisehik, Ita-boot hasoru malu ha lider Falintil Falur no Aluc, maibé iha lorokraik ne’e akontese disturbiu. Ema na’in rua be mate ne’e husi Aitarak. Tanba saida maka iha leten (lider) bele dame malu maibé iha kra´ik (membrus) ne’e lae?

Ida ne’e maka halo ha’u dezaponta (kecewa). Maibé kalan ha’u ko’alia ho Xanana, eh bele akontese hansean ne’e ka? Tuir Xanana, juventude ne’ebé iha Kuluhuan, Subdistritu Dili Leste ne’ebé lidera husi João “Choque” da Silva la’os ha’u maka lidera no CNRT maka kontrola. No, Falintil hamutuk ho funu-nain Integrasaun nian sei kontrola juventude hirak ne’ebé brutal ne’e. Ha’u hasoru Mauhudu (eis Assospol Xanana horiseik iha Polda) atu ko’alia kona-ba suspeitu oho ema iha loron 29 Agustus liu ba ne’e. Vitima maka Placido no Clementino. 

Se maka sai vitima no suspeitu ne’e la’os ema Falintil ka?

Vitíma husi membru Aitarak. Maudu no Riak Leman husi Falintil dehan, suspeitu la’os Falintil maka kontrola. Hafoin, ha’u hatete, se la’os Falintil nia okos entaun sé maka kontrola sira. Tanba, iha Tim-Tim ne’e iha grupu rua maka ida Falintil maka kontrola no ida seluk pro-integrasaun maka kontrola. Entaun, se la’os iha grupu rua ne’e ninia kontrolu, sé maka kaer sira nia kuda-talin? Tanba ne’e maka ita tenke halo operasaun hamutuk. 

Se husi Falintil sira tenke entrega?

Tanba ne’e maka hodi kalan ha’u kontaktu Xanana atu entrega ba UNAMET no polísia atu halo prosesu tuir lei ne’ebé vigora, suspeitu maka naran João da Silva ne’e. 

Oin nusá Ita-boot haree ba Xanana?

Ha’u haree no halo avaliasaun iha ema balun ne’ebé atu estraga. Sira hirak ne’e uluk la’o-tuir governadór no Administradór Distritu no selu-seluk tan. Maibé, tanba pozisaun ne’e troka ona ho ema seluk, sira mós frustradu hela. Ida ne’e ha’u hatete ona ba Xanana. Ha’u dehan ba Xanana katak Tim-Tim ninia independénsia ne’e sei la rezolve, se ema hirak ne’e sei iha Xanana nia sorin. Xanana ha’u respeitu ba Tim-Tim nia independénsia. Maibé, ema sira ne’ebé iha Xanana nia leet mesak frustradu de’it. 

Loron 31 Agustu Placido nia mate-isin hetan iha Subdistritu Dili Leste ho kondisaun  grave. Ninia isin-lolon hetan kanek-fatin ema sona ho tudik, mate-isin lori ba Aitarak nia akampamentu iha Tropikal Dili. Udan mata-wen monu ba rai. Ita boot nia komentáriu ba ida ne’e?

Ha’u hakarak kria dame, maibé ha’u-nia membru ema na’in ualu (8) Falintil foti-na´uk to’o oras ne’e seidauk hetan. Sira foti-na´uk iha tempu dame nia laran. 

Ita-boot nu’udar komandante nafatin tahan-an, Ita-boot nia membru mate ba beibeik?

Aitarak tahan-an, tanba ami konkorda horisehik ona. Maibé, sira oho ha’u-nia membru mós ami tahan-an nafatin. (nia hatan ho lian nakdedar, triste kahor ho hirus, Red.) Afinál, entre membru Aitarak hirak seluk hanesan Kaharasal Sulawesi, John husi Dili, no Domingos husi Kaikoli Dili, la tahan ona atu responde ninia maluk nia mate ne’e. Maibé ami sei tahan-an nafatin. 

Iha lia-anin katak se pro-independénsia manan Ita-boot aseita de’it, importante ninia lider ne’e ema ne’ebé durante ne’e luta ba Ukun Rasik-Án?

Ha’u koalia hanesan ne’e duni. Ha’u aseita de’it. Maibé la’ós dehan katak tenke hamutuk ho sira. Ha’u sidadaun Indonézia ne’ebé di’ak? Klaru katak ha’u simu autonomia. Sira bele harii sira-nia estadu (de direitu) foun. Signifika katak ha’u nafatin sai sidadaun Indonézia (WNI=Warga Negara Indonesia) la’os signifika katak ha’u iha Xanana Gusmão nia okos. 

Sé maka Ita-boot simu ne’e?

Xanana Gusmão ok, maibé Manuel Carrascalão deskulpa de’it, tanba uluk sira goza ona integrasaun. Tanba sira frustasaun ba pozisaun entaun tuir fali pro-independénsia. 

Ita nafatin sai pro-integrasaun?

Sim, integrasaun nafatin. Imposível ha’u trai ha’u-nia nasaun. Nasaun Indonézia. Ha’u hakarak ha’u-nia oan na’in tolu Anye (8), Nune (2) atu hatutan luta ba integrasaun. Ha’u ko’alia onestu katak husi hahú kedas ha’u luta ba Integrasaun. 

Ita-boot nia komentáriu kona-ba violasaun ne’ebé UNAMET halo iha Konsulta Populár ne’e?

Ida ne’e akontese ona durante ne’e. UNAMET ko’alia atu nune’e ema hotu ko’alia tuir sira-nia ko’alia, maibé sira mós la respeita no konsekuénsia ba sira-nia liafuan. Ezemplu, loloos ne’e tuku 09.00 dader Konsulta Populár hahú, maibé UNAMET hahú uluk ona iha dadersan tuku 06.00 no laiha tan observadór husi Indonézia. Ema ne’ebé iha maka funsionáriu lokál de’it no husi parte UNAMET. Sira obriga povu hili pro-independénsia. Ha’u protesta. Entaun, mosu buat ruma, ha’u husu ida ne’ebé responsabiliza ne’e maka UNAMET.  

Entaun, UNAMET la neutru?

Ha’u fiar katak UNAMET la neutru. Pro-independénsia bele manan maibé la´ós dehan katak ha’u ho ha’u-nia belun sira atu hamutuk ho sira. Ita sei halo ajenda katak ema ne’ebé moris iha nasaun foun labele xateia ema ne’ebé moris iha nasaun tuan. 

Ezemplu, ninia rezultadu maka %60 komparavel %40, Ita-boot nia parte hetan %40. Oin nusá se buat ne’e akontese nune’e?

Ha’u iha direitu, kuaze %40 nafatin hili no imposível atu halo traisaun. Nune’e, ida ne’ebé %60 ne’e maka atu haketak-án. Timor-Timur sei fahe malu—nakfera nune’e le’et de’it imposível ha’u husik le’et de’it. 

Sé maka responsabiliza se fahe-malu ne’e akontese?

UNAMET. Tanba sira-nia hahalok maka Timor-Timur fahe ba rua. Hanoin didi’ak, ha’u-nia membru mate maka ha’u ba hamutuk fali ho pro-independénsia. Ne’e furak tebes. Ha’u-nia membru sira oho tiha, ha’u tenke kontra. Presiza Ita-boot hatene katak UNAMET mai iha ne’e atu hala’o de’it sira-nia serbisu halo Konsulta Populár, nia la iha autoridade atu hamatan ba kazu kriminál.  

Ita-boot nia feen-kaben no nia oan simu Ita-boot nu’udar Komandante Aitarak?

Simu. Sira simu realidade ida ne’e. Ha’u-nia oan no ha’u-nia feen-kaben suporta tebes no atu mate hamutuk. 

Ita-boot prontu atu halo funu-sívil?

Ha’u prontu mosu funu-sívil, maibé ha’u nafatin hakarak dame. Maibé, dame saida maka agora ne’e iha? Parte Falintil foin daudaun maka hasoru malu ho ha’u (nia hasoru iha Baucau loron 29 Agustus 1999 liu ba ne’e, Red.). Nune’e ha’u sai husi UNAMET, ha’u-nia membru ema oho no soe hela de’it nune’e (ninia lian kotu-kotu ho oin mean tasak). 

Maibé, Aitarak tahan-án nafatin?

To’o rai nabeen, Aitarak nafatin tahan-án. Tanba vitória iha futuru be mai sei hetan husi ema ne’ebé hatene tahan-án. 

Progresu politika iha Timor-Timur halai makaas liu. Sábadu (04 Setembru 1999), ONU no UNAMET fó sai anunsiu katak votante ne’bé rezeita autonomia manan konsulta popular ho 78,5%. Jornalista GAMMA kontaktu Eurico Guterres, Sabado kalan, afinal nia iha tiha ona Bali (domingo nia fila hikas mai Dili).  

Ita-boot nia reasaun ba rezultadu Konsulta Populár ne’e nusa?

Ami nafatin simu rezultadu Konsulta Populár iha Timor-Timur. Maibé la’os dehan katak  Tim-Tim ukun rasik-án ona. Sei iha prosesu lubuk ida ne’ebé sei atinji iha asembleia jeral iha  parlamentu. 

Prosesu la’o halo nusa?

Prosesu hasoru ami maka ami hetan de’it %21 ne’e maka grupu pro-integrasaun ne’ebé nafatin sai sidadaun Indonézia. Ami sei la trai ami-nia nasaun rasik (Indonézia). 

Timor-Timur agora la seguru. Saida maka Ita-boot sei halo?

Antes Konsulta Populár, povu Timor-Timur—entre pro-autonomia no pro-independénsia—hamutuk konkorda katak autonomia mós bele, independénsia mós bele, maibé la hakarak funu. Ida ne’e maka halo povu sira tauk. Ha’u espera katak grupu pro-independénsia ne’ebé manan %78,5 ne’e tenke respeita ami. 

Kauza husi pro-autonomia lakon ne’e tanba UNAMET la neutru ka haliis ba pro-independénsia, iha planu atu halo protesta ruma?

Bosok ka lohi ida ne’e ami protesta liuhusi meius asaun demonstrasaun no hakerek karta ba UNAMET. Maibé UNAMET seidauk resposta. 

Karik sei mosu funu-sívil?

Ha’u haree labele sees ona. UNAMET hakarak Konsulta Populár atu kria dame. Maibé, dame ne’ebé sira hakarak ne’e la atinji, iha evidénsia sira la onestu. Satán, agora iha ema ne’ebé manan no lakon, sei susar atu atinji dame.  

Iha informasaun katak Falintil tama ona iha Dili no sei halao tiru-teiu iha anin leten?

Tanba sira manan. No, tanba ne’e, sira tiru arbiru de’it.

 Karik milísia Aitarak nonook de’it?

Aitarak prontu antisipa atu hasoru. Maibé, ami nafatin hakarak atu sira respeita ami atu labele estraga povu.

Jornalista: Cancio Ximenes

Editór      : Rafy Belo

HAKEREK NO HATÁN

Please enter your comment!
Please enter your name here