Karreta funeráriu fasilita tula meta isin iha teritoriu Timor-Leste. Imajen/MSSI

DILI, 22 jullu  2019 (TATOLI)-Iha polítika orsamentu jerál estadu (OJE) tinan fiskál 2020,  Diresaun Nasionál Asisténsia Sosiál (DNAS), Ministériu Solidariedade Sosiál no Inkluzaun (MSSI) prevee atu sosan tan karreta funeráriu haat (4).

Diretór DNAS,  Mateus da Silva. Imajen/Nelson de Souza

Diretór DNAS, Mateus da Silva,  ohin, iha nia servisu fatin, MSSI, Caicoli, Dili, informa katak,  previzaun DNAS nian sosa karreta funeráriu ne’e atu bele fó asisténsia ba komunidade bainhira presiza tulun hodi tula mate isin to’o sira ninia hela fatin.

Daudaun ne’e MSSI iha karreta funeráriu 40 resin; iha Dili hamutuk karreta funeráriu 13 ba atendimentu públiku no ida ba ema importante (VIP-sigla Inglés) no kada munisípiu inklui Rejiaun Administrativu  Espesiál Oe-Cusse Ambeno (RAEOA) iha karreta rua ne’ebé governu sosa ona iha 2009 no 2013.

“Ho polítika sosa tan karreta funeráriu ne’e bele apoiu liu tan servisu ba atendimentu nian públiku nia presiza,” informa Diretór DNAS, Mateus da Silva.

Nia klarifika katak, dala ruma servisu DNAS enfrenta difikuldade atu atende públiku nia proposta atu transporta mate isin iha tempu hanesan tanba karreta funeráriu la sufisiente. Mezmu nune’e, DNAS sempre jere rekursu natoon ne’ebé iha atu atende públiku nia proposta ho di’ak.

Iha proposta atu sosa karreta funeráriu haat ne’e atu aloka ida ba reforsa atendimentu VIP no tolu seluk destaka ba atendimentu públiku hodi tula mate isin ba aldeia sira no tula mós restu mortais.

Kona-ba orsamentu hira mak bele korresponde sosa karreta haat ne’e, Diretór DNAS informa, nia parte seidauk hatene tanba orsamentu tinan 2020 nian mak foin prevee.

Jornalista          : Nelson de Sousa

Editór                : Francisco Simões

HAKEREK NO HATÁN

Please enter your comment!
Please enter your name here