Vise Prezidente Parlamentu Nasionál, Maria Angelina Sarmento. Imajen/Egas Cristóvão

DILI, 22 jullu 2019 (TATOLI)—Vise Prezidente Parlamentu Nasionál (Vise-PPN), Maria Angelina Sarmento, husu Governu liuhosi Primeiru-Ministru, Taur Matan Ruak, tenke estabelese ona prazu hodi solusiona estrutura VIII Governu Konstitusionál.

“Primeiru-Ministru ho Prezidente Repúblika kontinua halo diálogu, maibé ha’u hanoin to’o ona tempu atu Governu ho reprezentasaun Primeiru-Ministru ne’ebé halo diálogu no  negosiasaun ho Prezidente Repúblika, tenke estabelese ona prazu kona-ba to’o bainhira mak ita hamriik iha inserteza ida ne’e,” tenik Vise PPN ba jornalista sira iha resintu Parlamentu Nasionál (PN), segunda ne’e.

Tuir Angelina, impaktu estrutura Governu la kompletu la’ós de’it ba ema na’in sia ne’ebé seidauk hetan pose, maibé ema na’in sia ne’e impaktu indiretu no diretu ba povu sira.

Angelina akresenta, povu rai ida ne’e iha direitu asesu ba rekursu estadu liuhosi orsamentu jerál Estadu (OJE) ne’ebé PN aprova ona no atribui ba kada ministériu, liliu ba ministériu ne’ebé liga direta ba povu nia moris, maibé realidade agora dadauk Ministériu Saúde, Ministériu Turizmu, Ministériu Estatal no Ministériu Finansa laiha ministru no iha de’it ministru en-ezersísiu.

“Ministériu sira ne’e xave atu halo ezekusaun no halo progresu dezenvolvimentu lalais ne’ebé fó impaktu direta ba povu mak pendente to’o agora, tanba ne’e ha’u hanoin Prezidente Repúblika tenke prudente haree situasaun ne’e,” nia preokupa.

Nia dehan, ne’e la’ós kestaun polítika maibé konsiénsia tanba haree povu liuhosi ema hirak ne’ebé hetan fiar hosi povu hodi ezekuta povu nia osan.

“Ida ne’e dezafiu ida maibé ha’u hakarak dezafia Governu atu haree asuntu ne’e ho rigorozu no toma desizaun lalais para ita responde tiha inserteza ida ne’e,” nia realsa.

Iha sorin seluk, Prezidente Parlamentu Nasionál (PPN), Arão Noe de Jesus mós preokupa ho estrutura Governu ne’ebé to’o oras ne’e ladauk kompletu.

“Ida ne’e ita hotu-hotu lamenta, tanba sé Governu mak la kompletu, ezekusaun programa sira la’o sei ladún di’ak, maibé ne’e ida-idak nia kompeténsia. Kompeténsia iha Prezidente Repúblika no ita hotu-hotu hein, ita hotu-hotu husu, Parlamentu mós hanoin presiza duni kompleta estrutura Governu nune’e serbisu bele efetivu hodi atinje meta ne’ebé ita hakarak tuir kompromisu partidu ida-idak ninian,” katak Arão.

Nia esklarese, desizaun atu troka membru governu indijitadu ne’e iha partidu, maibé desizaun ikus iha Primeiru-Ministru nia liman.

“Se Primeiru-Ministru dehan la troka kandidatu ida, pozisaun Governu nian mak ne’e, la troka  kandidatu ida sein iha justifikasaun legál kona-ba sira-nia problema,” realsa PPN.

Kandidatu indijitadu ne’ebé Prezidente Repúblika, Francisco Guterres Lú Olo, ladauk fó pose mak hanesan Ministru Finansa, Helder Lopes, Ministru Turizmu, Francisco Kalbuadi Lay, Minstru ba Asuntu Kombatente no Libertasaun Nasionál, Virgílio Smith, Ministru Saúde, Sérgio Lobo, Ministru Interiór (deklara rezigna aan ona), António Verdial, Vise Ministru Justisa, Amandio Benevides, Vise Ministru Negósiu Estranjeiru no Koordenasaun, José Turquel.

Purtantu, Ministru Planeiamentu no Investimentu Estratéjiku, Samuel Marçal no Ministru Petróleu no Rekursu Minerál, Alfredo Pires, Prezidente Repúblika, Francisco Guterres ‘Lú Olo’ aseita fó pose, maibé kandidatu na’in-rua ne’e lakohi, tanba hakarak fó solidariedade ba kandidatu membru governu na’in-hitu seluk.

Jornalista: Evaristo Soares Martins

Editór: Xisto Freitas

Notísia relevante:

PM Garante Loron Ida Sei Solusiona Kandidatu Membru Governu Pendente

PM-PR La Halo Konspirasaun Hodi Impede Kandidatu Membr Governu Sia

HAKEREK NO HATÁN

Please enter your comment!
Please enter your name here