Diretor Jeral MOP, Rui Hernani. Imajen/Florêncio Miranda Ximenes.

DILI, 22 jullu 2019 (TATOLI)-Diretór Jerál Ministériu Obra Públika, Rui Hernani, informa Governu sei forma konsellu interministeriál ida hodi halo identifikasaun ba propriedade abitante ne’ebé afeta husi haluan estrada trosu Tasi-Tolu to’o rotunda Komoro.

Diretór Jerál Ministériu Obra Públika, Rui Hernani, informa estudu preliminár finaliza ona, maibé presiza tan forma konsellu interministeriál atu hala’o identifikasaun ba asset abitante sira, molok halo pagamentu.

Konsellu interministeriál ne’e envolve husi Ministériu Obra Publika (MOP), Ministériu Justisa, Ministériu Administrasaun Estatál, Ministériu Agrikultura no Peska (MAP), Prezidente Autoridade Munisípiu Dili, Administradór Postu Administrativu no Xefe Suku sira.

“Ami sei halo hela identifikasaun ba propriedade, bens abitante ne’ebé hetan afeta hodi hala’o pagamentu, molok muda sira husi fatin ne’e”, Diretór Jerál MOP ba Ajénsia TATOLI, iha kna’ar fatin Faról, segunda (22/07).

Tanba ne’e, nia dehan MOP kontinua halo negosiasaun ho abitante kuaze 200-resin ne’ebé afeta ba haluhan estrada trosu Tasi-Tolu to’o rotunda Komoro hodi haree ba propriedade abitante liuliu uma no ai-horis.

Iha estudu preliminár, Diretór Jerál MOP dehan deteta kuaze rai ne’ebé abitante sira hela ne’e rai Estadu hotu, maibé abitante sira iha ona asset, ne’ebé presiza fó kondisaun.

Koba-ba orsamentu atu halo kompensasaun, Rui Hernani dehan seidauk iha kálkulu ba montante orsamentu tanba presiza hala’o identifikasaun detallada liuhusi konsellu ministeriál ne’e.

Estrada trosu Tasi Tolu-rotunda Komoro ne’e, nia dehan kuaze kilómetru rua hamutuk ho pakote estrada trosu Tibar-Tasi-Tolu ne’ebé ka’er husi kompañia internasionál China Wuyi ho kustu millaun $12-resin, hahú iha 28 fevereiru 2017 to’o outubru 2019.

Jornalista : Florêncio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here