DILI 20 jullu 2019 (TATOLI)–Kompania nasionál ne´ebé mak Kompania K-Link Internasionál-Your Global Link, fó fiar hodi sai importadór produtu K-Link iha Timor-Leste mak Kompania Beni & Yerlita, Unip Lda no kada fulan selu taxa ba estadu.

“Kompania ne’e rejistu iha Ministériu Saúde, Ministériu Komérsiu Indústria no mós iha Servisu Rejistrasaun no Verifikasaun Emprezariál (SERVE)  no kada fulan, kada  tinan, ami husi kompania selu taxa,” informa Diretór Kompania Beni & Yerlita, Unip Lda, Leonardo Benigno Tilman ba Ajénsia TATOLI iha treinamentu Product Talk kona-ba funsaun, benefísiu no efeitu produtu K-Link, iha Salaun Esperansa Elemloi, sábadu (20/07/2019).

Nia informa Kompania Beni & Yerlita harii iha Timór iha 2016 no hetan fiar husi Kompania K-Link internasionál hodi importa produtu K-Link mai Timor-Leste.

“Ita mós haree ba situasaun agora tanba kompania ida ne’e servisu kona-ba produtu herbal, ne’ebé ema sei moris presiza, hakarak saúde di´ak no saudável. No ba  oin, ami sei di´ak liután, kompania mós ajuda membru  K-Link iha Timór laran ne’ebé mak presiza produtu, ami prepara hela,” tenik  na´in ba Kompania Beni & Yerlita, Leonardo Benigno Tilman.

Nia haktuir:  “Hanesan uluk ita-nia maluk timoroan ne’ebé hala’o negósiu ba K-Link susar atu hetan produtu ne’e, bainhira sira presiza K-Link halai to’o iha ema nia rain hanesan Atambua, Kupang, mak foin hetan. Maibé, agora se de´it mk presiza produtu herbal K-Link bele hakat ba fatin K-Link internasionál Aitarak laran, Dili”.

“Produtu oioin mak iha fatin ne’ebá,  hakat ba, ami prepara hela iha K-Link  internasionál, Aitarak laran,” aviza na´in ba Kompania Beni & Yerlita, ne´ebé harii iha Timór iha 2016 ne´e.

Diretór Leonardo Benigno Tilman informa katak produtu herbal ne´e importa husi Indonézia. “Loloos la´ós indonézia de´it maibé produtu ne’e kompania ida naran K-Link internasionál sai hanesan distribuitór ba produtu ne’ebé mak di´ak kona-ba saúde nian iha mundu tomak. Tanba ne’e mak ita hanesan sai sira-nia mitra (parseiru) iha timór; produtu ne’e husi indonézia, Asian no nasaun seluk husi Europa, Amérika no Brazil”.

Notísia relevante: http://www.tatoli.tl/2019/07/membru-k-link-iha-timor-leste-hamutuk-7000/?fbclid=IwAR3HpvVnHXER5R9gvxnbn53LWRyySidkERSabaF0LO1HNnOs2er8fwU1aI4

Jornalista: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here