SEKOMS, Merício Juvinal dos Reis "Akara", akompaña husi akompaña husi membru governu no parlamentu iha lansamentu programa Naroman ba Suku iha Rotutu, foin lalais ne'e. Imajen/Natalino Costa.

MANUFAHI, 20 jullu 2019 (TATOLI)-Governu liuhusi Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, ofisialmente lansa ona programa Naroman ba Suku iha Rotutu, postu administrativu Same Villa, munisípiu Manufahi.

“Parabéns ba suku Rotutu ne’ebé maka sai hanesan suku dahuluk ba programa Naroman ba Suku”, Sekretáriu Estadu Komunikasaun Sosiál, Merício Juvinal dos Reis “Akara”, dehan bainhira lansa programa ne’e, ohin.

Iha fatin hanesan, Administradór Munisípiu Manufahi, Arantes Isac Sarmento, dehan hanesan servidór iha munisípiu ne’e sente kontente no agradese tebes.

Tanba liuhusi programa ne’e, bele halo identifikasaun ba potensiál saida maka suku ida-idak iha, liuliu iha Rotutu, oinsá mak Governu atu dezenvolve nune’e bele iha sustentabilidade iha suku Rotutu.

Administradór ne’e mós louva tebes suku Rotutu nia kolaborasaun no ho espíritu voluntarizmu ne’ebé di’ak ba lansamentu Programa Naroman ba suku ne’e rasik.

Xefe Suku Rotutu, José dos Santos, rekomenda ba Governu, bá oin kontinua hakbiit Programa Naroman ba Suku.

Tanba programa ne’e rasik di’ak hodi ajuda abitante sira. Governu bele identifika saida maka presiza hadi’a iha suku, nune’e hafasil Governu halo dezenvolvimentu.

Rotutu hanesan suku potensiál tanba iha fatin istórika no natureza, tanba ne’e liuhusi programa Naroman ba Suku, autoridade lokál hamutuk Governu bele buka solusaun.

Iha serímonia lansamentu pilotu ba programa Naroman ba Suku iha Rotutu husi SEKOMS, Merício Juvinal dos Reis “Akara” ne’e akompaña husi membru Governu balu, prezidente Konsellu Imprensa, Prezidente Rttl, EP, Ajénsia Notisioza Tatoli, autoridade munisípiu, parte seguransa no abitante sira.

Iha ámbitu lansamentu ne’e ho husik manu pombu sanulu. Atividade ne’e realiza ho montante osan dólar rihun 500.

Notísia relevante : Abitante Rotutu Agradese SEKOMS ba Programa Naroman ba Suku

Diálogu Komunitáriu no Konsertu Muzikál Prienxe Lansamentu Naroman ba Suku

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here