DILI, 20 jullu 2019 (TATOLI)-Diretór Ezekutivu K-Link Internasionál-Your Global Link,  Timor-Leste, Alberto dos Santos relata katak membru ativu K-Link iha Timor-Leste hamutuk ema na´in 7000.

Diretór Ezekutivu K-Link, Alberto dos Santos. Foto TATOLI: Felicidade Ximenes

“Membru ne’ebé servisu iha K-Link hamutuk 7000,  sai membru  ba produtu K-Link  ne’e iha timór. Seidauk konta tan iha mundu seluk tanba K-Link ne’e la´ós eziste de´it iha timór maibé iha mundu tomak,” informa Diretór Alberto dos Santos ba Ajénsia TATOLI iha treinamentu kona-ba Product Talk iha Salaun Esperansa Elemloi, Dili, sábadu (20/07/2019).

Prezensa K-Link Internasionál iha Timor-Leste, Diretór Alberto dos Santos informa, K-Link eziste iha timór tinan 12 ona, hahú 2007 até agora. Tuir nia, to´o agora ema barak mak hetan benifísiu husi produtu K-Link ne’e rasik hanesan ema barak mak hetan isin di´ak no ema barak ne’ebé servisu iha produtu K-Link mós hetan lukru maibé prosesu ida ne’e hanesan prosedimentu ida tenke liuhusi Servisu Rejistu Verifikasaun Emprezariál (SERVE) no mós Ministériu Komersiu Indústria no Ministériu Saúde liliu Diresaun Nasionál Farmasia hetan ona informasaun hirak ne’e.

Diretór K-Link Alberto Dos Santos akresenta, saúde iha ita-nia liman rasik hanesan motto (lema) Ministériu Saúde nian.  “Ami ba esplika ema balun hakarak oinsa atu prevene labele moras no lorloron  ami atu ba cek up (konsulta) ne’e lae, maibé  ami esplika katak ita iha globalizasaun ne’e ita dihadapkan (enfrenta) kondisaun hanesan ne’e;  hanesan han iha warung (restaurante), segala macam (buat oioin) hanesan ne’e sai fali veneno ba ita-nia an rasik maibé oinsa ita atu prevene ita hemu de´it han de´it, maibé ita mós bele konsumu (herbal) atu bele hasai veneno iha ita-nia isin”.

Nia esplika, produtu K-Link hanesan hahán hodi suplementa ema nia saúde ho funsaun atu bele hamoos veneno sira ne’ebé mak iha ema nia isin laran no mós halo balansu ema nia laran no renova ema nia selula ne’ebé mate ona iha isin laran hodi nune’e ema nia isin laran bele hadi´a fila fali.

“Suplementu no produtu K-Link  ne’e barak loos; suplementu kecantikan (bonita) no balun oinsa atu bele  halo prevensaun ba aan rasik para ita labele moras tanba agora daudaun teknolojia ne’ebé mak ita labele hein ona, tanba ne´e moras mai oioin de´it mas oinsa ita individuál atu prevene moras ne’e liuhusi produtu makanan suplement (hahán suplementár) ne’ebe mak ita iha,” hateten ezekutivu K-Link iha Timor-Leste no mós Konsultan Saúde K-Link, Alberto dos Santos.

Ezekutivu K-Link ne´e reforsa tan katak produtu herbal sira hanesan komplementár aimoruk sira tanba, tuir nia, aimoruk sira ne’e mós seidauk rezolve tenke aumenta tan suplementu sira, hodi nune’e aimoruk ba hamate virus, bakteria sira maibé suplementu sira ne’e ba renova fali sira seluk ne’ebé mate ona (selula).

“Produtu K-Link  kura moras barak; hamutuk 160 item. Tanba ne’e mak agora daudaun fó treinamentu ba produtu sira ne’e signifika katak produtu A, produtu B  atu halo saida, mai husi ne’ebé, informasaun sira ne´e hotu hetan husi  distribuitór, antes sira tuir treinamentu, hodi bele informa ba uma laran no mós viziñu sira ne´ebé mak prezisa aimoruk K-Link,” informa nia.

Diretór Ezekutivu K-Link Internasionál, Alberto dos Santos konfirma katak produtu K-Link ne´e iha benefísiu. “Ezemplu ha’u-nia an rasik. Ha’u benifísiu barak tanba momentu ha’u rasik hasoru problema fatuk iha ha’u-nia rins, to’o ha’u hemu produtu ne’e to´o ha’u di´ak, to’o agora, ha’u sente saida mak ha’u sente bele informa fali ba ema ne’ebé nia moras hanesan ha’u”.

 “Produtu  nia benifísiu ne’e oinsa hemu lorloron para veneno iha ita-nia isin, liuhusi raan, no mós liuhusi reprodusaun. Tanba ne’e  hemu beibeik,  ita-nia órgaun sira ne’e livre husi veneno ne’ebé mak iha ita-nia laran,” esplika diretór ne´e.

Entretantu, iha biban hanesan, Diretór Ezekutivu K-Link Internasionál, Alberto dos Santos haktuir mós ba Ajénsia TATOLI katak K-Link ne´e, antes loke iha 2007, K-Link hamutuk ho Ministériu Saúde liliu Diresaun Nasionál Farmasia, sira iha kompañia ida tama konta ba K-Link ho naran Beni & Yerlita, Unip Lda rejistu ona maibé sertifikadu mak seidauk iha.

“Maibé, prosedimentu ne’ebé mak Ministériu Saúde halo no ami-nia kompañia ne’ebé mak toma konta ba iha produtu K-Link hala’o ona prosesu ida ne’e,” haktuir diretór ne´e.

Jornalista       : Felicidade Ximenes

Editór              : Rafy Belo

HAKEREK NO HATÁN

Please enter your comment!
Please enter your name here