Vise-Ministra Solidariedade Sosiál Signi Chandrawati Verdial. Foto António Goncalves

MANUFAHI, 20 jullu 2019 (TATOLI)-Vise-Ministra Solidariedade Sosiál no Inkluzaun (MSSI), Signi Chandrawati Verdial, informa tinan oin, Governu sei hadi’a sistema atendimentu ba idozu no invalidés sira liuhosi halo redusaun ba kritériu sira, nune’e sira labele forma no la’o dook hodi ba simu osan.

Governante ne’e rekoñese katak durante ne’e, rona ona preokupasaun públiku liuliu benefisiáriu sira, tanba ne’e ministériu tutela iha hela prosesu nia laran atu buka dalan oinsá bele rezolve problema sira ne’ebé benefisiáriu sira hasoru liga ba prosesu pagamentu ne’ebé tarde no ferik ho katuas sira la’o oras hitu ka liu hafoin simu sira-nia osan.

“Planu governu nian, bá oin hamenus uitoan ita-nia kritériu sira, maibé ami sei konsulta ho BNCTL, hafoin bele muda, depois bele rezolve kestaun ferik ho katuas sira kuandu atu simu osan”, Signi Verdial hatete iha ámbitu diálogu komunitáriu iha suku Rotutu, postu administrativu Same, munisípiu Manufahi, sábadu (20/07).

“Pelumenus hamenus liután ita nian inan-aman sira ne’ebé la’o oras neen ka oras hitu nia laran, ita bele hamenus ba oras tolu no mós ita hanoin halo parseiru ba loja sira ne’ebé besik, sira bele lori de’it númeru atu sira bele ba foti sira-nia osan iha loja sira ne’e”, tenik.

Enkuantu, planu ne’e iha ona diskusaun maibé problema maka presiza tempu atu rezolve, la’ós ohin atu rezolve kedan, maibé fazeadamente liuhosi meiu oioin atubele hakbesik ba povu hodi fó atendimentu efikás no efisiente.

Notísia relevante : BNCTL Husu ba Idozu no Invalidés Labele Ansi Foti Osan

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here