Sekretáriu Estadu Arte no Kultura, Teófilo Caldas

MANUFAHI, 20 jullu 2019 (TATOLI)–Sekretáriu Estadu Arte no Kultura (SEAK), Teófilo Caldas, hatete bainhira Ministériu Obras Públikas halo estrada ruma ne’ebé afeta direta  ba patrimóniu kulturál, tenke koordena ho SEAK atubele konserva hafoin bele halo obra.

“Se Obras Públikas halo estrada karik tenke koordena ho Sekretáriu Estadu Arte no Kultura atubele haree sasán lulik sira tanba iha dekretu lei númeru 33/2017 proteje”, rekomenda SEAK, Teófilo Caldas liuhosi diálogu komunitáriu, iha ámbitu lansamentu programa pilotu Naroman ba Suku iha Rotutu, postu administrativu Same, munisípiu Manufahi, sábadu.

Governante ne’e kontinua apela ba komunidade sira atu salva guarda patrimóniu kulturál, hanesan uma lulik, fatuk lulik, ai lulik, foho lulik no seluk tan.

Aleinde ne’e, SEAK fó apoiu ba komunidade sira ne’ebé halo uma lulik, kuandu konstrusaun to’o ona porsentu 25 ka 50 maibé kbiit la to’o ona, SEAK iha devér atu fó osan uitoan atubele finaliza sira-nia uma lulik.

Aleinde ne’e, tuir planu iha 2020, Sekretariu Estadu Arte no Kultura sei harii biblioteka nasionál, muzeum nasionál, sentru kulturál iha munisípiu hotu maibé SEAK tau uluk prioridade ba munisípiu tolu maka Baukau, Likisá no Dili.

Jornalista : Natalino Costa

Editora : Maria Auxiliadora 

HAKEREK NO HATÁN

Please enter your comment!
Please enter your name here