Komandante Nasionál Nasionál Timor-Leste (PNTL) Munisípiu Baucau, Superintendente Xefe Hermenegildo Gonçalves da Cruz. Imajen Tatoli/ Hortençio Sanchez

DILI, 19 Jullu 2019 (TATOLI)—Komandante Nasionál Nasionál Timor-Leste (PNTL) Munisípiu Baucau, Superintendente Xefe Hermenegildo Gonçalves da Cruz informa, sira-nia parte sei koopera hamutuk ho FALINTIL-Forsa Defeza Timor-Leste (F-FDTL) hodi fó seguransa ba eventu Festivál Nasionál Desportu (FND) ne’ebé sei realiza iha Baucau, setembru mai ne’e.

“PNTL Baucau %100 garantia fó seguransa ba eventu Festivál Nasionál Desportu (FND) ne’ebé sei hala’o mai ne’e. Ami sei mobiliza hotu komponente hirak ne’ebé destakadu iha Baucau hodi asegura eventu ne’e bele la’o ho susesu no labele mosu konflitu ruma. Komandu Baucau mós koordena di’ak loos ho komponente Terrestre F-FDTL Baucau nian, tan ne’e ami fiar eventu ne’e sei la’o ho di’ak,” katak Komandante ne’e ba jornalista iha edifísiu Konfederasaun Desportiva Timor-Leste (CDTL-sigla Portugês), Caicoli, Dili, ohin.

Aleinde ne’e, Komandante ne’e husu ba atleta hotu ne’ebé atu dezloka ba Baucau iha tempu besik tenke kolabora mós ho Komandu ida-idak nian no kontatu ba Komandu Baucau hodi hatene loos prosesu viajen.

“Eventu ida hala’o iha Baucau ne’e orgullu ida ba ita nu’udar timoroan. Ne’e duni, husu komunidade nia apoiu atu kria pás no estabilidade. Sé mak hakarak kria konflitu iha eventu ne’e, PNTL Baucau sei la halimar ho sé de’it,” tenik Hermenegildo.

Entretantu, totál membru efetivu (polísia) iha Autoridade Munisipál Baucau dadaun ne’e hamutuk atus-rua sanulu resin hitu (217).

Jornalista: Hortençio Sanchez

Editór: Xisto Freitas

Notísia relevante: Baucau Preparadu Sai Uma-na’in ba FND

HAKEREK NO HATÁN

Please enter your comment!
Please enter your name here