Diretór DNAS-MSSI, Mateus da Silva. Imajen/Nelson de Sousa

DILI, 19 jullu 2019 (TATOLI)- Iha tinan ne’e, Diresaun Nasionál Asisténsia Sosiál (DNAS), Ministériu Solidariedade, Sosiál no Inkluzaun (MSSI), hahú utiliza sistema foun naran SITGA (Sistema Integrado de Trámites de Gestión Aeronáutica)  hodi rejistu foun ba ema ne’ebé atu asesu ba programa bolsa da mãe.

“Uluk DNAS uza rejistu manuál, maibé ba tinan 2019 hahú uza sistema SITGA modernu,” informa Diretór DNAS,  Mateus da Silva, ohin, iha nia servisu fatin, MSSI, Caicoli, Dili.

Mateus da Silva klarifika katak, benefísiu sistema SITGA  ne’e hodi garante transparénsia rejistu foun ba ema ne’ebé atu asesu bolsa da mãe no halo re-ajustamentu  ba benefisiáriu ne’ebé  antes asesu ona.

“Ezemplu ida mak ema ne’ebé mate ona ka labarik ne’ebé liu ona tinan 17 ajusta ba sistema identifika sei la simu ona subsídiu,” esplika Mateus da Silva.

Iha tinan 2018  total benefisiáriu ba programa bolsa da mãe  hamutuk  600.000 resin no hala’o pagamentu. Maibé, depois sistema foun Sigas  deteta uma kain 14.698 no labarik besik 100.000 tanba uma kain balun hahú  tuir padraun moris di’ak natoon  no labarik balun ne’ebé idade liu 17 nune’e labele hetan subsídiu.

Ho sistema ne’e fornese ona  dadus iha 2019 hatudu  benefisiáriu númeru redús hela família uma kain  46.272 no labarik 134.323  ho tota hotu benefisiáriu 180.595.

“Prosesu asesu rejistu hodi hetan subsídiu  bolsa da mãe, primeiru tenke liuhosi komunikasaun  lider komunitária iha suku sira, katak ema ne’e moris  vulnerál ekonómiku no sosiál duni hafoin  ekipa DNAS halo verifikasaun,” informa Mateus da Silva.

 Jornalista          : Nelson de Sousa

Editór                : Francisco Simões

HAKEREK NO HATÁN

Please enter your comment!
Please enter your name here