DILI, 19 jullu 2019 (TATOLI)-Ajénsia Kooperasaun Internasionál Japaun nian (JICA-sigla inglés), ohin, finaliza ona formasaun kona-ba dezeñu no analiza ba sistema fornesimentu bee ba funsionáriu na’in ualu (8) hosi Diresaun Nasionál Servisu Abastesimentu Bee Moos, Munisípiu Dili.
Formasaun ne’e bele hasae koñesimentu no kapasidade funsionáriu DNSA nian ba sistema kanalizasaun bee moos iha kapitál Dili.
Xefe Departamentu Abastesimentu Bee Moos Munisípiu Dili, Francisco Xaviér Pereira informa, JICA estabelese kooperasaun ho DNSA, kada tinan rua, tanba ne’e antes finaliza kooperasaun ne’e, organizasaun internasionál JICA aproveita hodi fornese formasaun ba funsionáriu atu nune’e bele hasae koñesimentu intermus sistema kanalizasaun, jestaun no seluk tan.
Formasaun ho durasaun semana ida, hahú husi loron15-19 jullu, nia alvu mak oinsá trasa planu kona-ba distribuisaun bee moos, regra abranzamanetu, jestaun ba kanalizasaun no fornesimentu bee moos ba konsumidór.
Jornalista : Osória A. Marques
Editór : Francisco Simões
