Prezidente Autoridade Munisipál Baucau ne’ebé hanesan mós Prezidente Komisaun Organizadora ba FND, António A. Guterres. Imajen Tatoli/Hortençio Sanchez

DILI, 19 jullu 2019 (TATOLI)—Tinan ida ne’e, Autoridade Munisipál Baucau sai uma-na’in ba eventu Festivál Nasionál Desportu (FND) durante semana rua, ne’ebé realiza hosi Sekretaria Estadu Juventude no Desportu (SEJD) no CDTL.

Tanba ne’e, Prezidente Autoridade Munisipál Baucau ne’ebé hanesan mós Prezidente Komisaun Organizadora ba eventu refere, António A. Guterres relata, Baucau preparadu atu sai uma-na’in ba eventu FND.

“Kondisaun desportiva nian atu realiza eventu ne’e preparadu ona. Kampu ida mak dook uituan hosi kapitál munisipíu, iha Triloka ne’ebá, maibé agora hadi’a namanas hela. Estádiu agora prepara hela lampu karik jogu ruma atu hala’o iha kalan no Jináziu rasik prepara ba basketball no voleiball,” dehan António ba jornalista iha edifisiu Konfederasaun Desportiva Timor-Leste (CDTL- sigla Portugés), Dili, ohin.

Totál orsamentu ba eventu refere hamutuk rihun $340. Totál atleta ne’ebé sei partisipa iha eventu ne’e hamutuk 884 hosi modalidade hanesan Futeból, Atletizmu, Basketball, Voleiball no seluk tan hosi munisípiu sanulu resin-tolu (13) inklui Rejiaun Administrativa Espesiál Oé-Cusse Ambeno (RAEOA).

Ema númeru ida iha Baucau ne’e informa, prémiu ba manán na’in sira sei simu medalla osan mean no mutin inklui ho osan. Eventu ne’e sei realiza hahú 2-10 setembru mai ne’e. Antes ne’e, tinan kotuk, eventu refere hala’o ona iha Autoridade Munisípál Bobonaro ne’ebé organiza hosi SEJD, CDTL no Prezidente Autoridade.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here