Komunidade simu Sekretáriu Estadu Komunikasaun Sosiál, Merício Akara, bainhira sosializa programa “Naroman Ba Suku” iha área rurál. Imajen Mídia SEKOMS

MANUFAHI, 19 jullu 2019 (TATOLI)-Abitante suku Rotutu, Verdial da Silva, espresa sentimentu kontente no agradese ba Sekretáriu Estadu Komunikasaun Sosiál (SEKOMS) ba programa Naroman ba Suku ne’ebé sei lansa iha aban.

Verdial da Silva, hanesan mós lia-na’in hatete liuhusi programa ne’e, suku Rotutu bele asesu ba programa Governu nian.

“Suku ida ne’e, uluk nakukun maibé realidade agora, liuhusi programa Naroman ba Suku bele asesu programa Governu nian”, Verdial dehan iha Rotutu, postu administrativu Same Villa, munisípiu Manufahi, ohin.

Iha Fatin hanesan, Mariano da Silva “Valeia”, hatutan programa ne’e ba dahuluk ne’ebé Governu lansa iha suku ne’e no bele lori transformasaun ba joven sira iha suku Rotutu.

Prezidente Komisaun Organizadora Naroman ba Suku, Orlando da Conceição, hatete knaar SEKOMS nian ba Naroman ba Suku nu’udar programa xave ida husi SEKOMS oinsá atu halo dezenvolvimentu ba informasaun.

“Hau hanoin, kna’ar seluk ne’ebé SEKOMS pretende hala’o iha programa ida ne’e, oinsá bele esplora poténsia sira ne’ebé maka iha suku ida nee liuliu Rotutu nian, nune’e bele halo forma de foti profile suku hodi divulga fali ba nasionál no internasionál liuhusi meiu komunikasaun sosiál”.

Jornalista Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here