Enkontru entre estrutura Organizasaun Populár Feto Timor-Leste (OPMT-sigla Portugés) ho Prezidente Repúblika (PR), Francisco Guterres Lú Olo, kona-ba livru Partisipasaun Feto iha Luta. Imajen Mídia PR

DILI, 19 jullu 2019 (TATOLI)—Organizasaun Populár Feto Timor-Leste (OPMT-sigla Portugés) ne’ebé durante ne’e lidera ekipa elaboradór livru kona-ba Partisipasaun Feto iha Luta, aprezenta livru ne’ebé konklui ona ba Prezidente Repúblika (PR), Francisco Guterres Lú Olo iha Palásiu Prezidente Nicolau Lobato, Bairru Pité, Dili, ohin.

Livru ne’e ho títulu  ‘Buibere Hamriik Ukun Rasik-Aan’ no ekipa elaboradór husu ba Xefe Estadu atu lansa iha loron 4 setembru tinan ne’e.

Hafoin enkontru ho Xefe Estadu, Sekretária Jerál OPMT interina, Florentina Smith, hateten planu inisiál ba lansamentu livru ne’e mak iha loron 28 agustu 2019,  nu’udar loron moris OPMT, maibé tanba líder nasionál sira okupadu ho programa estadu liliu komemorasaun tinan-20 referendu, OPMT marka fali loron istóriku sira seluk.

Nia informa mós katak, antes ne’e, reprezentante OPMT hasoru ona líder nasionál sira hanesan Sekretáriu Jerál FRETILIN, Marí Alkatiri no Prezidente Partidu CNRT, Xanana Gusmão, hodi husu sira nia hanoin kona-ba livru ne’e.

OPMT husu hanoin, tanba projetu ne’e hahú ho apoiu tomak hosi líder nasionál Xanana Gusmão, Ramos Horta, Taur Matan Ruak, Lere Anan Timur, Francisco Guterres Lú Olo no Marí Alkatiri. Tanba ne’e, OPMT sei relata fali obra no husu partisipasaun hosi líder sira iha serimónia lansamentu livru ne’e.

Florentina esplika, kona-ba angariasaun fundu ba projetu hakerek livru ne’e, dezde tinan 2010 ho partisipasaun no apoiu hosi líder nasionál sira. Aleinde hetan apoiu hosi líder nasionál sira, projetu ne’e mós hetan suporta hosi Gabinete Primeiru-Ministru, liuhusi Diresaun Sosiedade Sivíl.

Kona-ba prosesu hakerek, Florentina relata, atu transmiti memória luta hosi protagonista sira ba jerasaun foun, OPMT ne’ebé harii Comissão de Pesquisa da Elaboração História da Luta Mulher Timor, rekruta joven na’in-20 hodi hala’o entrevista no hetan oportunidade atu apriende luta emansipasaun durante okupasaun Indonézia.

Nia hatutan, Komisaun ne’e hala’o entrevista ba ema liu 800 iha Timor laran tomak, nu’udar parte hosi konservasaun memória luta. Liu tan ida ne’e, Komisaun dokumenta entrevista sira liuhusi transkrisaun, gravasaun aúdiu no foto fonte sira. Tuir planu, dokumentu sira ne’e sei entrega ba entidade relevante atu bele fó asesu ba públiku.

Sekretária Jerál OPMT interina ne’e mós kontente tanba durante enkontru, Prezidente Repúblika haksolok ho obra OPMT ne’ebé konklui ona, hodi hakerek feto timoroan tomak, la’ós de’it OPMT nia luta ba ukun rasik-aan no emansipasaun.

Nia husu ba públiku atu bele haree Sumáriu hosi livru ‘Buibere Hamriik Ukun Rasik-Aan’ iha espozisaun temporária ne’ebé tau iha Arquivo e Museu da Resistência Timorense (AMRT).

Florentina mós fo hanoin katak maski livru ne’e seidauk lansa, maibé luta feto Timor ninian integra tiha ona iha kurríkulu ensiñu báziku, ne’ebé Ministériu Edukasaun elabora atu implementa iha futuru.

Jornalista: Cipriano Colo

Editór : Xisto Freitas

HAKEREK NO HATÁN

Please enter your comment!
Please enter your name here