Ekipa delegasaun Timor-Leste ne´ebé sei ba Jakarta. Foto: MNEK

DILI, 18 jullu 2019 (TATOLI)-Governu Timor-Leste (TL) liuhusi Ministériu Negósiu Estranjeiru no Kooperasaun (MNEK), diresaun ASEAN (Organizasaun Sudeste Aziátiku-sigla inglés) konvoka reuniaun hamutuk ho liña ministeriál sira hodi ko´alia kona-ba dezlokasaun ba Jakarta, Indonézia.

Jornalista TATOLI, Nelia Fernandes entrevista ho Diretór ASEAN, Jorge Trindade Camões. Foto: MNEK

“Objetivu ami bolu hamutuk maluk sira husi liña ministeriál sira no fahe informasaun kona-ba dezlokasun ne’ebé mak atu halo ba Jakarta iha tempu badak,” hateten Diretór Jerál Asuntu ASEAN, Jorge Trindade  Neves Camões ba Ajénsia TATOLI iha nia kna’ar fatin, Praia dos Coqueiros, kinta (18/07/2019).

Diretór  Jorge Camões informa, ekipa grupu traballu ASEAN nian atu dezloka ba Jakarta hodi ko’alia ho ofisiál sekretariadu ASEAN nian atu aprende oituan, familiariza ita-nia aan ho ASEAN ne’e rasik.

“Enkuadramentu órganika ASEAN ninian, oinsa ASEAN nia servisu, oinsa ASEAN foti desizaun, oinsa ASEAN organiza enkontru sira, haree mós instrumentu ho legais saida mak ASEAN nian, ita ba ne’ebá (Jakarta) atu buka hatene no aprende ho sira prosesu ASEAN ne’e rasik no prosesu tomak ASEAN nian,” dehan diretór ASEAN.

Nia informa, sei haruka delegasaun ida kompostu husi ofisiál nain-20 hodi partisipa iha vizita estudu ba iha Sekretariadu ASEAN iha Jakarta. “Ida ne’e mak ba dala-uluk Timor-Leste haruka delegasaun ida ne’ebé boot hodi ba vizita Sekretariadu ASEAN no ko’alia kona-ba programa servisu kompriensivu ASEAN nian”.

Diretór ne’e esplika, delegasaun ne´e lidera no koordena husi diresaun jerál ba asuntu ASEAN iha Ministériu Negósiu Estranjeiru no Kooperasaun. Delegasaun ne’e kompostu husi diretór jerál no pontu fokál sira husi liña ministeriál sira ne’ebé halo servisu liga ho adezaun ba ASEAN iha pilar tolu; pilar ekonomia, pilar polítika no seguransa no pilar sósiu-kulturál.

Nia informa katak partisipante sira sei aranka husi Dili iha loron sábadu, 20 jullu 2019 hodi atende enkontru ne’ebe marka ona ba loron 22-24 jullu 2019.

Entretantu, tuir komunikadu MNEK nian ba TATOLI katak delegasaun ne´e nu´udar delegasaun boot ba enkontru tékniku iha sekretariadu ASEAN husi Timor-Leste.

 “Ida ne’e mak ba dala-uluk Timor-Leste haruka delegasaun ida ne’ebe bo’ot hodi ba vizita Sekretariadu ASEAN no ko´alia kona-ba programa servisu kompriensivu ASEAN nian,” refere komunikadu ne´e.

Delegasaun Timor-Leste ne´ebé sei dezloka ba Jakarta, iha sábadu ne´e hodi atende enkontru ne’ebe marka ona ba loron 22-24 Jullu 2019. Sira sei ko´alia kona-ba asuntu importante barak, inklui mós aprende kona-ba ASEAN nia enkuadramentu intitusionál no estrutura orgánika, prosesu foti desizaun, instrumentu no akordu legál, no kooperasaun téknika.

Enkontru ne’e akontese hafoin Timor-Leste nia Ministru Negósiu Estranjeiru no Kooperasaun,  Dionísio Babo Soares, simu konvite hodi ba halo enkontru kortezia ho Sekretáriu-Jerál ASEAN,  Dato Lim Jock Hoi, iha Jakarta iha Maiu 2019. Parte rua ne’e ko´alia no mai ho konkordánsia, no servisu hamutuk hodi realiza vizita importante ne’e.

Adezaun ba ASEAN sai hanesan prioridade nasionál no estratéjika ba Timor-Leste. Adezaun ne’e sei la fo deit benefísiu ba Timor-Leste nia ekonomia nasionál, maibé sei kontribui mós ba ekonomia Estadu Membru ASEAN nian no promove dame no estabilidade iha rejiaun ASEAN.

Tinan ne’e marka aniversáriu ba dala-8 dezde Timor-Leste espresa nia interese hodi sai membru ASEAN. Komesa kedas husi nia aplikasaun formál iha 2011, Timor-Leste hala’o ona servisu tékniku barak hodi asegura katak nasaun ne’e prontu atu sai membru plena ASEAN.

Jornalista: Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here