DILI, 18 jullu 2019 (TATOLI)-Adjuntu Munisípiu Dili, José Filipe Ximenes Smith, oras ne’e, asume mós kargu provizóriu nu’udar Administradór Postu Administrativu Dom Aleixo hodi substitui matebian Simplício dos Santos Mendonça, hodi hein nomeasaun foun hosi Governu no Komisaun Funsaun Públika (CFP-sigla portugés).
“Nomeasaun ba Administradór Postu Administrativu Dom Aleixo seidauk definitivu, mezmu Munisípiu Dili hato’o ona proposta ba CFP nian maibé seidauk simu resposta ba proposta refere,” informa Adjuntu Munisípiu Dili, José Filipe Ximenes Smith, ba Jornalista sira iha Postu Administrativu Dom Aleixo, kuarta (17/07/2019).
Nia dehan tan, substituisaun ne’e hodi prienxe servisu administrasaun, liuliu ba funsionamentu instituisaun no administrasaun no mós atendimentu públiku ba populasaun iha Postu Dom Aleixo.
Matebian Administradór, Simplício dos Santos Mendonça, hakotu iis iha meadu fulan Juñu 2019 tanba ne’e, Adjuntu Munisípiu Dili, José Smith, substitui ona servisu durante fulan ida resin.
Jornalista : Osória A. Marques
Editór : Francisco Simões
