Prezidente Parlamentu Nasionál, Aniceto Lopez Guterres.

DILI, 18 jullu 2019 (TATOLI)—Prezidente Bankada FRETILIN, Aniceto Guterres, peokupa ho prosesu dada kadoras (pipeline) Greater Sunrise mai Timor-Leste tanba konsidera sosa kadoras ho osan karun.

“Ami dehan alterasaun ne’e la nesesáriu ba ratifikasaun tratadu ida ne’e, tanba ne’e kadoras la sai konkista ba tratadu. Ita sosa kadoras ho folin boot no folin osan-mean. Ita sosa ho millaun $56 ho retornu ne’ebé sei dúvida. Ita sei buka tan tusan. Ami haree ida ne’e ita penõr ita-nia rain, peñor ita-nia soberania no ita halo peñor ba ita-nia estadu,” dehan Aniceto Guterres liuhusi ninia deklarasaun polítika iha debate jeneralidade Proposta Alterasaun Lei Haat iha plenária Parlamentu Nasionál, ohin.

Aniceto preokupa tanba empreza ne’ebé fó asesoria ba governu propoin altera Lei Fundu Petrolífera númeru 9/2005, 3 agostu no Lei Atividade Petrolífera númeru 13/2005, iha ne’ebé konsidera fó de’it satisfasaun ba Investidór Petrolífera balun.

Entretantu, deklarasaun polítika Bankada FRETILIN ne’e halo Negosiadór Prinsipál Delimitasaun Fronteira Marítima, Xanana Gusmão nérvu no sai hosi plenária. “Oh… CMATS no CMATS (Certain Maritime Arrangement in The Timor Sea) tinan 50 ne’e…,” líder nasionál ne’e piada ba Aniceto Guterres.

Ho liafuan badak, Xanana temi tan katak akordu Certain Maritime Arrangement in The Timor Sea (CMATS) inválida ona.

Hafoin ne’e, Xanana husik hela Ministru Estadu Prezidénsia Konsellu Ministru, Hermenegildo Augusto Cabral Pereira ho ekipa negosiasaun, ekipa ANPM (Autoridade Nasionál Petróleu no Minerál), ekipa Timor GAP no audiénsia tomak iha plenária.

Xanana hatudu reasaun ne’e molok FRETILIN vota kontra proposta lei númeru 5/V, segunda alterasaun lei 9/2015- 3 agostu kona-ba Lei Fundu Petrolífera; proposta lei númeru 6/V- primeira alterasaun lei númeru 8/2008, 30 juñu kona-ba Lei Tributária no primeira alterasaun lei númeru 3/2003, 1 jullu kona-ba Tributasaun Kontrante ba Bayu-Undan.

Nune’e mós, primeira alterasaun lei númeru 4/2003, 1 jullu kona-ba Dezenvolvimentu Petróleu iha Tasi Timor (estabilidade tributária); segunda alterasaun lei númeru 13/2005, 2 setembru- lei Atividade Petrolífera no númeru 7/V-Rejime Laborál no Migratóriu Espesiál Aplikável ba projetu Bayu-Undan.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here