DILI, 18 jullu 2019 (TATOLI)–Aban (19/7), ekipa rua ne’ebé promovidu ona ba Primeira Divizaun Liga Futeból Amadora (LFA) époka tinan ida ne’e, Aitana FC no DIT FC, sei hasoru malu dala ikus nian hodi buka sé loos mak sai kampiaun ba Segunda Divizaun ne’ebé sei hala’o iha Estádiu Munisipál Dili.
Jogu ekipa rua sei joga ho ritmu ne’ebé aas tanba jogadór ekipa rua maioria mesak prestasaun di’ak hotu. Antes ne’e, DIT ho Aitana nu’udar ekipa dezpromovidu iha époka tinan 2015. Maibé, iha époka 2016, DIT konsege hiit-án fila ba Primeira Divizaun maibé hala’o nia viajen jogu époka ida de’it tanba dezpromovidu hikas ba Segunda Divizaun.
Enkuantu, Aitana FC halo esforsu maka’as iha époka dala tolu tutuir malu no konsege fila ba eskada primeiru (Primeira Divizaun) iha époka 2019 ne’e.
Treinadór Aitana FC, Salvador Pires konfesa katak Aitana preparadu ona atu hasoru armada DIT. “Ami preparadu tebes. Jogadór ami-nian aban sei tuun kompletu hotu maibé buat hotu minutu 90 mak sei determina,” dehan Salvador liuhosi konferénsia ba imprensa ne’ebé hala’o ohin iha salaun Xanana Sport Center, Bairru Formosa, Dili.
Salvador mós husu ba árbitru atu dirije jogu ho neutru nune’e bele halo jogu sai furak ba ema hotu atu asisti.
Iha fatin hanesan, kapitaun DIT FC, José Santos (7) hateten Aitana ekipa ne’ebé forte maibé sira mós fiar-án aban sei hatudu jogu ne’ebé di’ak hodi sai hanesan primeiru lugár Segunda Divizaun.
“Ami prepara ona fulan ida resin. Aitana ekipa ida ne’ebé boot maibé ami prontu joga ho sira. Hakarak lakohi aban jogu ida ne’ebé espesiál entaun ami sei esforsu maka’as,” dehan Santos.
Jornalista: Hortençio Sanchez
Editór: Xisto Freitas
