Kontestante DAA-5 husi Timor-Leste. Foto TATOLI: Cancio Ximenes

DILI, 17 jullu 2019 (TATOLI)—Ekipa juri Indosiar ba audisaun programa foun “Golden Memories Asia 2019” no programa DAA-5 ka D´Academy Asia, ohin, hala’o dadaun audisaun ba kontestante DAA-5 hamutuk ema 50 resin no tuir planu sei halo audisaun ba kontestante Golden Memories Asia 2019 hamutuk ema 30 resin iha loron aban (kinta) iha studio ETO+ TV.

Antes ne’e, ekipa juri Indosiar halo audisaun ba programa rua refere, halo tiha ona audisaun iha nasaun Asia seluk hanesan Filipina, Tailándia, Malázia, Singapura no Brunei Darrusalam. Iha tinan ida ne’e, aumenta tan ho nasaun Filipina entaun agora sai nasaun hitu mak tuir kompetisaun DAA-5 no Golden Memories Asia 2019 iha televizaun privadu Indosiar iha Indonézia.

Programa foun “Golden Memories Asia 2019” ne’e hala’o bazeia ba esperiénsia no observasaun bainhira sira hala’o audisaun iha nasaun hirak ne’e, nasaun idaidak dezenvolve no promove múzika tuan sira iha sira-nia programa televizaun ninian, Ezemplu, iha Malázia, programa “Kilau Kemilau”ne’ebé oferese de’it múzika tuan sira ba haree na’in sira. Bainhira Indosiar iha hanoin atu kria programa “Golden Memories Asia 2019”, hetan kedas resposta di’ak tanba fasil ba kontestante sira atu kompete hodi lori hananu múzika pop sira de’it.

“Objetivu halo kompetisaun “Golden Memories Asia 2019” hanesan ho DAA-5 mak atu hametin amizade entre nasaun Asia sira liuhusi arte. Ita ko’alia kona-ba arte no dalen, buat rua ne’e sei halo nasaun Asia sira sai unidu. No, liuhusi kompetisaun ne’e, ita bele kuñese no hatene nasaun ida-idak ninia kultura. Amizade ne’ebé agora ita hametin liuhusi Golden Memories ne’e, komik, tanba mesak katuas sira mak tuir kompetisaun refere,” dehan VP Programming no Juri Audisaun Indosiar, Ekin Gabriel Surbakti, ba Ajénsia TATOLI liuhusi entrevista hafoin pauza halo audisaun iha Stúdio ETO+ TV iha Fatuhada, Dili, kuarta (18/7/2019).

Husi audisaun ne’e, nia hatutan, ba Golden Memories ekipa juri sei hili konestante na’in tolu (3) hodi reprezenta nasaun ida-ida ba tuir komptesiaun iha Indosiar. Tanbasá la’ós na’in lima, juri ne’e hatán, ida ne’e relasaun ho epizódiu tanba programa ida ne’ebé atu realiza uluk ne’e mak “Golden Memories Asia 2019”.

“Ha’u dehan ida ne’e ita ko’alia kona-ba durasaun ba programa ne’e rasik. Tanba DAA-5 tenke ramata iha dezembru nia rohan, entaun Golden Memories ninia epizódiu ne’e termina tiha ona tuir programa, entaun kontestante sira mós ita termina tuir durasaun. Golden Memories sei hahú iha 1 setembru 2019 to’o outubru nia rohan. Hafoin ne’e, DAA-5 sei hahú iha outubru nia klaran to’o dezembru nia rohan,” nia informa.

Entretantu ba kontestante DAA-5 ema na’in 50 resin ne’ebé ohin hala’o audisaun, juri ne’e hateten, husi kontestante hirak ne’e balun iha ona lian dangdut ne’ebé di’ak no balun cengkok dangdut iha nanis ona. Kantadór/a sira Timor-Leste, tuir nia, kuñesidu ho power ne’ebé makaas no balun iha karakter hananu orijinál Timor-Leste ne’ebé furak tebes. Jeralmente, kontestante hothotu  mesak di’ak.

Nia hatutan, kontestante ba tinan ida ne’e barak mak iha ona esperiénsia natoon iha hananu. Jeralmente, tuir nia, iha tinan ida ne’e (2019) tama ona ba tinan haat entaun sira iha ona referénsia husi kantadór/a DAA Timor-Leste ne’ebé uluk ba sira. Tinan ida ne’e, kontestante sira-nia preparasaun di’ak liu kontestante sira iha tinan hirak liubá.

“Kriteria sira ba avaliasaun mak kantadór/a tenke hatene kanta ho loloos katak tenke kontrola vokál, nada tenke pas, labele picing no labele fals. Daruak, tempu labele haksoit ba mai de’it, tenke pas no foku para kanta ne’e tenke kuidadu tempu. Datoluk, dinámika katak tenke hatene bainhira mak hasa’e lian makaas no lian mamar. Dahaat mak sentimentu; kantadór atu sente múzika ne’e fó mensajen saida no tama iha múzika ne’e nia laran.  Dalimak mak ami buka cengkok dangdut maibé ida ne’e la’os prinsipál tanba buat cengkok ne’e sei bele aprende,” nia haktuir.

Kona-ba rezultadu avaliasaun, nia informa, hanesan hirak seluk ne’ebé audisaun liutiha ona, juri nia knaar mak mai hakerek, grava no rezultadu garavasaun ne’e sei lori ba Indosiar. Iha Indosiar,  ekipa programming (programasaun) Indosiar nian mak sei deside sé mak manan no sé mak la lakon. Desizaun ne’e sei halo iha Jakarta la’ós iha Timor-Leste.

“Tinan ida ne’e, ami sei hili ema na’in lima (5) husi nasaun ida-idak. Tanba Filipina tama tan ona entaun kada nasaun ida, ema na’in lima reprezenta nasaun ida-idak. Tinan kotuk nasaun lima, entaun kada nasaun ema na’in neen (6) entaun totál ne’e ema na’in 42. Tinan ida ne’e, kada nasaun ema na’in lima, entaun totál kontestante DAA-5 agora ne’e iha totál ema hamutuk ema na’in 35,” Ekin esplika.

Notísia relevante:

Ohin, Audisaun DAA-5 Hala’o Iha Timor-Leste

Jornalista       : Cancio Ximenes

Editór             : Rafy Belo

HAKEREK NO HATÁN

Please enter your comment!
Please enter your name here