Prezidente Autoridade Nasionál Petróleu no Minerál (ANPM), Gualdino da Silva.

DILI, 17 jullu 2019 (TATOLI)-Prezidente Autoridade Nasionál Petróleu no Minerál (ANPM), Gualdino da Silva, dehan bazeia ba peskiza aero-jeofízika ho sistema sízmiku no magnétiku hatudu katak Timor-Leste iha potensialidade riku ba petróleu no gás.

“Ita-nia Timor-Leste iha ezisténsia mina-matan ka gás matan, hahú husi kosta Súl parte Suai nian to’o parte Leste, Lospalos,” informa Gualdino, ohin, iha audisaun konjunta entre komisaun B,C no D iha Parlamentu Nasionál.

Tuir mapeamentu, Prezidente ANPM ne’e dehan kuaze Timor-Leste hanesan iha área Vikeke, Betanu entre Suai no Same, inklui iha Lospalos nian iha gás matan no petróleu.

“Timor-Leste sai hanesan nasaun potensiál ba baze petróleu nian tanba ita-nia rai ne’e iha no eziste duni mina-matan no gás matan iha área barak liuliu iha parte fronteira Bobonaru to’o Lospalos,” katak.

Tanba ne’e nia dehan, liuhusi estudu no peskiza ne’e, presiza iha kontinuasaun halo perfurasaun ba mina-matan ne’ebé eziste ona.

Gualdino afirma, kamada fatuk sira ne’ebé iha, posibilidade bele akumula petróleu ne’e ho metru 4000 iha rai-maran no tasi-laran iha produsaun ne’e kuaze metru 3000 hetan ona.

“Daudaun ne’e, ita iha kontratu rua ba peskiza sízmiku mina-matan iha rai okos. Kompañia Timor Resources no TIMOR GAP ne’ebé finaliza ona parte Suai, Ainaru no Manufahi nia no fulan oin kontinua ba perfurasaun,” nia dehan.

Iha fatin hanesan, Xefe Negosiadór Prinsipál ba Asuntu Fronteira Marítima, Xanana Gusmão, hatete ho potensialidade petrolífera ne’ebé Timor-Leste iha, presiza duni ona polítika atubele hahú operasaun petrolífera.

“Ita tenke halo ona polítika hodi halo produsaun hodi bele dudu ekonomia no sosiál iha Timor Leste,” Xanana afirma.

Jornalista: Florêncio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here