DILI, 17 jullu 2019 (TATOLI)-Atu asegura area tasi ibun Kaza Europeia nia oin to’o Largo Lecidere, livre husi atividade negósiu fa’an karreta ho motor, Autoridade Munisípiu  Dili, oferese ona espasu provizóriu ba negosiante sira iha eis Kuartél Jenerál F-FDTL, Caicoli, Dili (Tribunal Rekursu nia oin), atu bele hala’o sira nia atividade negósiu.

Adjuntu Prezidente Autoridade Munisípiu Dili, José Filipe Ximenes Smith,  hateten, liuhusi prosesu negosiasaun ho negosiante motor no karreta,  konsege konkorda malu hodi evakua ba fatin provizóriu iha Caicoli hodi husik mamuk ona tasi ibun Casa Europa nian oin to’o Largo Lesidere.

“Atu kontribui sidade Dili sai furak no mós  solusaun ida di’ak liu maka negosiante sira tenke loke kampaña para estadu bele fó autorizasaun  hodi fasilita fatin hodi fa’an atu apoiu mós reseita ba kofre estadu,” hateten José Simth.

Nia dehan, fatin alternativu ba negosiante fa’an motor ho karreta seidauk iha tanba ne’e sira muda ba fa’an lai sira nia karreta ho motor iha Caicoli.

Nia dehan tan,  Autoridade Munisípiu Dili hamutuk ho Polisia Nasionál Timor Leste (PNTL) no FALÍTIL-Forsa Defeza Timor Leste (F-FDTL) mós iha ona planu atu  kontinua halo operasaun konjunta hasoru negosiante ne’ebé la kumpre orden hodi kontinua fa’an iha estrada públiku atu muda hotu ba Merkadu Manleuana ho Taibesi.

José Smith informa, governu mós iha ona planu  iha tinan 2020 ka 2021 atu haluan tan Merkadu Manleuana hodi akumula hotu vendedór sira atu fa’an sira nia produtu.

“Ami iha planu atu halo alargamentu ba  merkadu Manleuana ne’ebé mak estadu sosa tiha ona rai,  maibé impase polítika no mós orsamentu laiha durante tinan rua nia laran, entaun konstrusaun ba merkadu ne’e la konsege halo,” hateten José Smith.

Jornalista : Osória A. Marques

Editór       : Francisco Simões

HAKEREK NO HATÁN

Please enter your comment!
Please enter your name here