DILI, 17 jullu 2019 (TATOLI)-Governu liuhusi Ministériu Justisa (MJ), ohin, ofisiálmente estabelese kontratu arrendamentu ho Banku Nasional Ultramarinu (BNU-sigla portugés) ho durasaun tinan 10 ba utilizasaun proprietáriu Estadu nian iha Akait, Dili, hodi fasilita atendimentu ba BNU nia kliente sira.
Ba kontratu arrendamentu hodi legaliza BNU uza mós espasu antiga edifísiu Timor Telecom (TT) nian iha Akait kontempla mós obrigasaun ba BNU atu selu ba estadu fulan-fulan $1.000 liu.
Iha kontratu arrendamentu ne’e, BNU mós aprezenta pedidu atu haluan tan fatin iha area Akait no iha posibilidade atu halo revizaun ba kontratu depende ba valor rai iha merkadu.
“Daudaun ne’e sira selu fulan ida hamutuk mil itál dollars depois tinan tolu mak ita haree ba valór merkadu nian, inflasaun tanba folin ne’e la’ós fiksu, maibé altera beibeik ba kada tinan tolu nian laran,” informa dehan Ministru Justisa, Manuel Cárceres da Costa, ba Jornalista sira hafoin asina nota kontratu arrendamentu ne’e ho Dirijente BNU iha Ministériu Justisa Caicoli, Dili.
Manuel Cárceres esplika, governu aseita kontratu ne’e hafoin simu pedidu husi BNU atu haluan tan eis edifísiu Timor Telekom Akait no BNU Akait sai edifísiu ida de’it hodi fó atendimentu ba ninia kliente sira.
“Ohin halo asina kontratu ona entaun BNU iha kompeténsia atu bele hadi’a ona fatin rua ne’e sai fatin ida de’it ba BNU tanba fatin ne’e iha sentru besik Palásiu Governu no Banku Sentrál entaun ho BNU nia ezisténsia bele fasilita sidadaun sira ne’ebé mak presiza,” hateten Manuel Cárceres da Costa.
Jornalista : Osória A. Marques
Editór : Francisco Simões
