Doutór Andre Belo entrevista ho jornalista Ajénsia TATOLI. Foto TATOLI: Felicidade Ximenes

DILI, 15 jullu 2019 (TATOLI)—Organizasaun Naun Governamentál Saúde Ba Ema Hotu (SABEH) preokupa ba doutór “herbal”, ho inisiál SdC, ne’ebé konsulta pasiente sira uza laptop tama sai uma hodi detekta komunidade nia moras.

“Ha’u ema ne’ebé kuriozu atu hatene doutór ne’ebé uza laptop tama-sai uma atu identifika ema hotu nia moras, katak moras oioin de’it nia bele detekta hotu. Hanoin katak buat sira ne’e nunka eziste iha área médiku,” dehan Diretór SABEH, Andre Belo, ba Ajénsia TATOLI iha nia knaar fatin  iha Externatu São José  Manleu, Dili, ohin.

Nia hatutan, saúde ne’ebé di’ak tenke halo esplikasaun no tenke kolekta informasaun liuhusi ezaminasaun fízika. Hafoin ezonera laboratóriu mak foin deskonfia ka detekta moras hafoin tratamentu.

“Lori laptop tama-sai uma hodi detekta hodi ema-nia moras no aimoruk ho folin ás to’o $700 ka $1000,  hanoin buat sira ne’e imposibel tebes. Tanba laiha aimoruk ida ne’ebé ho folin to’o $700 ka $1000. Ne’e informasaun ne’ebé la loos,” nia  konsidera.

Nu’udar médiku, nia salienta, hahahlok ida ne’e la justu. Tanba, tuir nia, bazeia ba fonte informasaun ne’ebé espalla iha rede sosiál katak ninia alvu ba ema sira ne’ebé laiha koñeseimentu. Maibé ita lakohi uza maneira ne’ebé iha hodi bosok ita-nia komunidade ne’ebé atu hola produtu herbal sira hanesan ne’e.

Nia hateten, nia la bandu ema atu halo bisnis (negósiu) maibé ho negósiu ne’ebé tenke justu. Ema hotu halo bisnis hodi hadi´a sira-nia moris ne’e normál. Maibé bisnis ida ne’ebé foti lukru rasik atu hariku fali ema seluk, ne’e la’ós bisnis ne’ebé di’ak.

“Se lahatene kona-ba ida ne’e tenke konsulta ba doutór sira ne’ebé iha kapasidade . La’ós ba mosu iha sosiedade no komunidade nia leet, katak ha’u doutór para populasaun sira tenke hola aimoruk sira hanesan ne’e. Doutór ne’ebé loos, doutór ne’ebé la fa´an produtu arbiru no la halo promosaun ba aimoruk katak aimoruk ida ne’e mak di’ak liu,” Andre esplika.

Notísia relevante: http://www.tatoli.tl/2019/07/sabeh-fatin-voluntariu-ba-mediku-sira/?fbclid=IwAR18IUPllVqob2i57Zc1HFSjY3EVAlVxmoIDpm6ognzyXx4hHhCnRw60xFo

Jornalista: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here