Logotipu SABEH

DILI, 15 jullu 2019 (TATOLI)—Organizasaun Naun Governamentál Saúde Ba Ema Hotu (SABEH) nu’udar fatin voluntáriu ba médiku sira atu serbi komunidade iha área rurál ho voluntáriamente. Médiku sira ne’ebé haknaar-án iha SABEH mak médiku sira ne’ebé mai husi médiku jerál, saúdé públika, parteira, enfermeira no mós paramédiku sira.

“Médiku sira ne’ebé agora daudaun iha SABEH mak médiku jerál hamutuk ema na’in 30, saúdé públika ema na’in 5, parteira ema na’in 4 no paramédiku hamutuk ema na’in 4. Ami iha ne’e mesak voluntáriu hotu. Ami laiha finanseiru atu fó ba médiku sira ne’ebé mai haknaar-án iha organizasaun ne’e,” informa Diretór Ezekutivu SABEH, Andre Belo, ba Ajénsia TATOLI iha nia knaar fatin iha Externatu São José Manleu, Dili, segunda (15/7/2019).

Nia hatutan, durante ne’e laiha apoiu orsamentu husi Ministériu Saúde (MS) no husi doadór permanente ruma. Maibé, nia dehan, durante sira halo atividade iha área rurál, sira hirak ne’e mak soe osan hamutuk hodi haforte organizasaun refere.

Kona-ba aimoruk sira ne’ebé sira utiliza ba serbi komuniade iha área rurál, nia informa, hetan apoiu husi Governu Timor-Leste liuhusi Ministériu Saúde liliu husi Serbisu Autónomu Medikamentu Ekipamentu Saúde (SAMES).

Alende hetan apoiu aimoruk husi governu, nia haktuir, hetan apoiu mós husi klinika balun ne’ebé eziste iha Timor-Leste. Aimoruk  balun ne’ebé besik ona fulan ida ka rua atu liu prazu, SABEH bele uza aimoruk hirak ne’e ba fahe gratuitu ba komunidade sira área remotas ne’ebé dook husi postu saúde.

“Aimoruk sira ne’e mak hanesan infeksaun, ulun fatuk moras, isin manas, katar, vitamina, matan-mean no tilun-moras tanba ita ba komunidade nia leet ne’e ba ho aimoruk kompletu. Tanba sira mai asesu iha saúde mós dook, entaun ita lakohi komunidade sira mai to’o iha ita-nia oin hato’o sira-nia problema, ikus aimoruk laiha. Ne’e, la duun justu ida,” Andre Belo haktuir.

Notísia relevante: https://web.facebook.com/Saudebaemahotu/

Jornalista: Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here