Diretór Verifikasaun no Lisensa LFA, José Carvalho (imajen liman loos). Imajen Tatoli/Hortencio Sanchez

DILI, 16 Jullu 2019 (TATOLI)—Liga Futeból Amadora (LFA) liuhosi Diresaun Verifikasaun no Lisensa, iha segunda (15/7),  termina ona rejistrasaun ba klube hotu iha Timor laran tomak atu submete dokumentu nune’e bele partisipa iha jogu Terseira Divizaun ne’ebé sei realiza iha tempu besik.

Iha loron ikus rejistrasaun ne’e, Diresaun verifikasaun LFA konsege simu rejistu klube hamutuk sanulu resin ida. Klube sanulu resin ida ne’e maioria hosi munisípiu hitu hanesan Lautém, Ainaro, Bobonaro, Ermera, Liquiça, Aileu no Manatuto.

Diretór Verifikasaun no Lisensa LFA, José Carvalho informa loloos klube sanulu resin-sia (19) mak kompete iha jogu Terseira Divizaun époka 2019 nian. “Loloos klube sanulu resin-sia mak partisipa maibé klube sanulu resin-ida (11) de’it mak mai hatama dokumentu entaun sira ne’e mak bele partisipa iha jogu ne’ebé sei realiza,” dehan José liuhosi konferénsia ba imprensa ne’ebé hala’o iha salaun Xanana Sport Center, ohin.

Klube sanulu resin ida ne’e mak hanesan ADR União, YMCA FC, AS Transforma de Futebol, FC Pasific Aileu, FC Kuda Ulun, FC Laleia United, AS Marca Futeból Clube, AS Lero, FC Imanuel, AD Maubisse no Ermera City.

Hosi klube hirak ne’e, klube sia nia dokumentu kompletu ona no hela rua, AD Maubisse no Ermera City, mak sei presiza tan halo kompleta dokumentu.

Entretantu, hosi klube sanulu resin ida ne’e, bainhira joga só klube rua mak iha oportunidade avansa ba Segunda Divizaun hodi troka Cacusan FC no FC Lero ne’ebé dezpromove ona hosi Segunda Divizaun époka ida ne’e.

“Iha tempu badak, ami sei bolu ekipa hirak ne’ebé priénse ona kritéria atu mai rona informasaun loloos kona-ba oráriu oinsá atu halo implementasaun ba jogu Terseira Divizaun ida ne’e,” tenik José Carvalho.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here