Sekretáriu Estadu Juventude no Desportu, Nélio Isaac Sarmento. Imajen Egas Cristovão

MANATUTO, 15 jullu 2019 (TATOLI)—Sekretáriu Estadu Juventude no Desportu (SEJD), Nélio Isaac Sarmento husu ba públiku no klube atu haree kondisaun Estádiu Munisipál Dili bele ka lae atu realiza jogu kontinuasaun Liga Futeból Amadora (LFA) époka ida ne’e.

“Loro-loron ita hotu ba iha Estádiu Munisipál Dili hodi haree. Klube sira mós haree. Ita-nia fasilidade mak ida oan ne’e de’it entaun ita tenke kuidadu. Razaun klube sira nian ne’e loos, jogu semana ida bele dala haat, maibé ita bele fó kondisaun ba kampu ne’e, lae, tanba duut ne’e só bele joga semana ida dala rua de’it para loron sira seluk ne’e ema sira serbisu iha ne’ebá ne’e rega,” dehan Nélio hodi hatán ba ezijénsia klube neen (6) ne’ebé hamahan-án iha Primeira Divizaun hasoru órgaun LFA no Sekretaria Estadu Juventude no Desportu (SEJD) ba kalendáriu jogu ne’ebé hala’o durasaun kle’ur tebes hodi fó impaktu ba jestaun finanseiru.

Nia haktuir, informasaun barak nia parte simu ona hosi klube maibé seidauk rona hosi parte Federasaun Futeból Timor-Leste (FFTL) no Liga Futeból Amadora (LFA).

Tuir Nélio, bainhira atu hala’o jogu hotu lais tuir kalendáriu ne’ebé públika ona, jogu tenke lori sai ba munisípiu hanesan Baucau no Maliana.

Relasiona atu hala’o jogu iha Baucau no Maliana, parte finansa LFA relata ona katak labele hala’o jogu iha munisipiu tanba orsamentu la sufisiente, governante ne’e reponde: “Ha’u lahatene LFA halo jestaun oinsá. Maibé, kona-ba osan atu to’o ka la to’o, ita tenke hatene oinsá jestaun iha LFA. Ezemplu, SEJD atribui osan rihun tolu-nulu $300,  FFTL fó rihun atus ida lima-nulu $150, depois hosi patrosinadór uituan. Entaun, ha’u atu husu, osan hirak ne’e tau hamutuk atu halo investimentu oinsá”.

Nia haklaken, tuir lei, se orsamentu  ne’e pursentu 100 hosi Governu, entaun orsamentu ne’ebé tulun hosi patrosinadór tenke halo relatóriu hatama ba konta Governu. Maibé, nia dehan, kestaun hirak ne’e Governu la tau ba kestaun no husik LFA realiza lai Liga refere la’o to’o ramata hafoin parte Governu tuur hamutuk ho LFA hadi’a fallansu hirak ne’ebé mosu nune’e ema hotu bele kompriende di’ak liu kona-ba prosesu ne’ebé la’o atu bele halakon duun malu.

Jornalista: Hortençio Sanchez

Editór: Xisto Freitas

Notísia relevante:

Klube Neen Primeira Divizaun Kontra Desizaun LFA

LFA Prontu Realiza Jogu Semana Ida Dala Haat

 

 

HAKEREK NO HATÁN

Please enter your comment!
Please enter your name here