Vise-Prezidente Sensu Agríkola 2019, Cesar José da Cruz, entrega hela matéria no fasilidade ba partisipante iha abertura ToT, iha salaun Funsaun Kristal, Balidi, segunda (16/7/2019). Foto/Antónia Gusmão.

DILI 15 jullu 2019 (TATOLI)- Treinadór hamutuk 200 ne’ebé hetan fiar hosi Ministériu Agrikultura no Peska (MAP) no Ministériu Finansa liuhosi Diresaun Jerál Estatístika partisipa treinamentu ba treinadór ka training of trainers (ToT) ba Sensu Agríkola 2019.

Atividade ne’e hala’o durante semana rua, hahú iha segunda 15-24 jullu 2019, iha salaun Fundasaun Kristal, Balidi, ho objetivu atu kapasita no treina koordenadór no supervizór sira, nune’e bá fali hodi fó treinamentu ba enumeradór ou hirak ne’ebé liu iha selesaun.

Treinamentu ho tema “Ha’u-Nia Resposta, Hau-Nia Futuru” ne’e loke hosi Sekretáriu Jerál MAP, hanesan mós Vise-Prezidente Sensu Agríkola 2019, Cesar José da Cruz.

Vise-Prezidente Sensu Agríkola, Cesar José da Cruz, husu ba partisipante sira atu aprende no atensaun didi’ak, nune’e bele ba treina fali hirak ne’ebé iha munisípiu no postu administrativu sira.

“Sai treinadór ne’ebé di’ak, hein katak sensu 2019-2020 bele halo ho di’ak. Ita hotu sei fó apoia malu. Buat ne’ebé iha, sei sai baze fundamentál hodi ezekuta desizaun polítika no finanseira ninian. Hein katak hosi rezultadu Sensu Agríkola bele ajuda polítiku sira ezekuta polítiku ho di’ak tuir planu ne’ebé iha”, Cesar José da Cruz hatete iha abertura ba treinamentu Sensu Agríkola 2019, ohin.

Diretór Interinu Diresaun Jerál Estatístika, Crispino Gusmão, hatete Sensu Agríkola importante tebes ba Governu liuliu ajuda tebes MAP.

“ToT ho objetivu atu kapasita treinadór sira bainhira bá fali fó treinamentu iha baze. Husu tenke fokus para bele kompriende hodi treina fali enúmeradór, tékniku GPS no supervizór.

Nia afirma, Estado hein rezultadu hosi sensu agríkola 2019 ne’ebé ho kualidade hodi dezenvolve agrikultura.

ToT ne’ebé hala’o durante semana rua nia laran ne’e hafahe ba parte rua iha teoria no prátika nian.

Antes ne’e, Diretór Jerál Estatístika, Elias dos Santos Ferreira, informa rekrutamentu ba Sensu Agríkola nian, rekruta entrevistadór hamutuk 1.293, ema ida ka’er GPS ka sistema pozisionamentu globál hodi sukat natar no to’os 646, supervizór 646, kondutór 40, pesoál ne’ebé ajuda iha sekretariadu hamutuk 40 no treinadór 200 ne’ebé mak halo ona treinamentu.

Notísia relevante : Sensu Agríkola 2019 Realiza Fali Iha Juñu-Jullu

Jornalista: Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here