Jornalista sira ne'ebé estuda lingua portugés. Imajen/Espesiál

DILI, 15 jullu 2019 (TATOLI) – Profesóra lingua Portuguesa, Fátima Marques, husu ba jornalista timoroan sira atu kontinua aprende lingua portugés, la’ós iha aula de’it, maibé tenke aprofunda koñesimentu liuhusi lee leitura portugés loroloron.

Profesóra Fátima Marques.

“Ha’u hanoin kona ba kursu lingua Portuguesa ba jornalista sira iha evolusaun boot no signifikante tanba alunu barak mak iha koñesimentu, komprensaun no aplikasaun lingua Portuguesa ne’ebé di’ak, maibé buat ne’ebé di’ak liu mak tenke iha ábitu lee leitura mesak atu aumenta di’ak liu tan ida-idak ninia koñesimentu,” hateten Profesóra Fátima Marques ba Ajénsia TATOLI, iha Dili, domingu (14/07/2019).

Profesóra Fátima mós kontente ho jornalista timoroan balun ne’ebé mak komesa ona hakerek notísia iha lingua Portugués iha media imprime no eletrónika hanesan susesu mós ba diseminasaun informasaun ba rai laran no rai li’ur.

Nia kontinua husu atu kualifika aan hodi sai mensajeiru ba ema seluk liu husi serbisu jornalizmu, nune’e nia parte motiva no dezafia nafatin jornalista sira atu kontinua aprende lian Portuguesa inklui mós lian seluk (inglés).

Fatima mós husu ba jornalista sira tenke iha rigorozu  ba informasaun ho loos no dignu, nune’e halo publikasaun tuir faktu atu bele sai jornalista ne’ebé professional, sériu ho kualidade.

“Ha’u hanoin jornalista timoroan iha kapasidade atu aprende lalais, maibé mós haluha lalais. Ha’u  husu atu kontinua aprende, labele baruk atu estuda no aprende lingua portugés,” tenik profesóra Fátima.

Nia mós dezafia Ajénsia Notisioza de Timor Leste (TATOLI.IP) hanesan ajénsia estadu, se bele halo mós divulgasaun informasaun lian portugés ba Timor no mundu tanba ajénsia mós iha ona rekursu umanu natoon ho alunu lubuk ida ne’ebé mak akaba ona nivel B2 no ofisina eskrita.

Jornalista           : Domingos Piedade Freitas

Editór                 : Francisco Simões

 

HAKEREK NO HATÁN

Please enter your comment!
Please enter your name here