Estádiu Manatuto. Imajen Tatoli/Hortençio Sanchez

MANATUTO, 15 jullu 2019 (TATOLI)—Sekretáriu Estadu Juventude no Desportu (SEJD), Nélio Isaac Sarmento hatete semana hira liu-ba Governu hala’o ona soru-mutu ho Konsellu Administrativu Fundu Infraestrutura (KAFI) iha ne’ebé foti ona desizaun ba Kompañia Obrai hodi mantein kaer obra Estádiu Manatuto nune’e bele finaliza lalais.

Nélio haktuir, durante ne’e obra refere kaer hosi kompañia lokál Obrai Unpesoal, maibé seidauk finaliza tuir kontratu.

“Administradór foun kompañia nian ne’e mai hasoru ha’u bebeik ona. Sira promete bainhira Governu hanaruk sira-nia kontratu no sira sei finaliza obra ne’e iha tempu badak,” nia dehan ba jornalista iha Munisípiu Manatuto, ohin, hafoin halo fiskalizasaun ba Estádiu Manatuto.

Governante ne’e tenik, kompañia kontinua mantein dezeñu ne’ebé iha antes ona. Totál orsamentu hodi konstrui estádiu ne’e tokon $2 no Governu selu ona pursentu 60 ba kompañia maibé to’o agora seidauk finaliza. Estádiu ida ne’e governu sei fó naran Kay Rala Xanana Gusmão.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here