DILI, 15 jullu 2019 (TATOLI)–Dadus husi Ministériu Solidariedade Sosiál no Inkluzaun (MSSI), fó sai katak, terseira idade (ferik no katuas) ho invalidés rihun 97 resin iha territóriu, konfirmadu hetan subsídiu husi governu ba pagamentu faze dauluk, ne’ebé hahú iha segunda ohin (15/07/2019 ).
Prezidente Konsellu Administrasaun Institutu Nasionál Seguransa Sosiál (INSS), Longuinhos Armando, informa katak, Banku Nasionál Komérsiu Timor Leste (BNCTL, sigla portugés), ohin, hahú ona halo pagamentu ba terseira idade no invalidés durante fulan neen, komesa husi janeiru to’o juñu 2019.
“Ohin, ita hahú halo pagamentu ba ferik no katuas sira iha territóriu laran tomak,” informa Longuinhos Armando, ba Ajénsia TATOLI, iha nia serbisu fatin, MSSI, Caicoli, Dili.
Governu aloka ona Orsamentu Jerál Estadu (OJE) milloens $34 ba programa ne’e iha tinan 2019, tanba kada fulan benefisiáriu ida simu $30, fulan neen $180 no tinan ida $380.
Nia dehan tan, prosesu pagamentu la’o tuir kalendáriu BNCTL nian, maibé governu propoin atu halo iha territóriu durante semana ida ne’ebé hala’o iha Munisípiu, Postu Administrativu no mós to’o ba benefisiáriu sira nia hela fatin bainhira kondisaun fíziku ka saúde la permite atu lao to’o fatin pagamentu.
Prezidente Konsellu ne’e husu ba autoridade lokál hanesan Xefe Suku no Xefe Aldeia presiza hato’o informasaun antes ba serbisu banku hodi halo pagamentu to’o iha benefisiáriu sira nia hela fatin.
Jornalista : Nelson de Sousa
Editór : Francisco Simões
