Defensor Públiku, Estaquio Guterres.

DILI, 15 jullu 2019 (TATOLI) – Kazu detensaun ba kazál timoroan ne’ebé lori droga, kazu Tiago Fong Fong ho kazu eis Ministra Finansa, Emilia Pires nian, sai hanesan lisaun ba Estadu Timor Leste, liuliu Governu liuhusi Ministériu Reforma Lejizlativu no asuntu Parlamentár (MRLAP), inklui Parlamentu Nasionál, atu toma konsiderasaun ba lei estradisaun ho kooperasaun judisiál.

Jurista timoroan, Estaquio Guterres ho Manuel Tilman, rekomenda, atu Governu ne’ebé lidera husi Primeiru-Ministru, Taur Matan Ruak, presiza buka ona solusaun ba lei estradisaun no kooperasaun judisiál ho nasaun viziñu hanesan Australia, Indonézia inklui mós Portugal.

“Ha’u hanoin Governu ho Parlamentu Nasionál presiza toma konsiderasaun ba lei estradisaun no kooperasaun judisiál ho nasaun sira ne’ebé mak presiza halo kooperasaun,” hateten Defensór Públiku Estaquio Guterres, ohin, ba Ajénsia TATOLI, iha Tribunal Distritál Dili (TDD).

Nia hatutan, se Timor Leste mak iha vontade no inisiativa hodi halo kooperasaun ho rai sira seluk no prodús lei rua nee, fasil atu detein kriminozu ne’ebé mak dupla sidadania no halai ba subar iha rai sira ne’ebé halo ona kooperasaun judisiál.

Jurista, Manuel Tilman

Jurista Manuel Tilman aprofunda tan, lei rua ne’e importante tebes ba nasaun ida ba ida seluk, bainhira hasoru kazu krime ruma presiza fasilita malu tanba aplikasaun lei kada nasaun la hanesan.

Ezemplu, mak kona ba kazu kazál lori droga tama territóriu Indonézia, balun fali mak hanesan kazu Tiago Fong Fong inklui mós Emilia Pires, estadu TL labele halo buat ida tanba laiha lei rua nee.

“Ha’u hanoin, foin daudauk, Menteri Hukum dan HAM Repúblika Indonézia, Yasouna H. Laoly hasoru malu ho Prokuradór Jerál Repúblika (PJR), José da Costa  Ximenes ho Embaixadór TL iha Indonézia, Alberto X.P Carlos, espera, bele ko’alia mós kooperasaun judisiál rai rua ne’e nian,” tenik Manuel Tilman.

Nia hatutan, Estadu TL liuhusi MRLAP hamutuk ho deputadu sira presiza toma konsiderasaun, atu próteze destinu sidadaun TL bainhira halo krime iha ema nia rain no seluk mak kuandu kriminozu TL halai ba ema nia rain tenke kaer tanba iha akordu rua nee.

Jornalista  : Domingos Piedade Freitas

Editór        : Francisco Simões

HAKEREK NO HATÁN

Please enter your comment!
Please enter your name here