DILI, 15 jullu 2019 (TATOLI)–Prezidente Komisaun Funsaun Públika (CFP-sigla portugés), Faustino Cardoso, husu ba funsionáriu públiku atu iha espíritu no enerjia foun hodi sai forsa ba hametin liután unidade hodi dezenvolve instituisaun estadu ida ho integridade aas ba serve públiku.
“Imi (funsionáriu públiku-red) nia papél estratéjia tebes-tebes hodi hala’o kna’ar ba atendimentu públiku sira no hasae prestasaun di’ak serbisu nian ba públiku hodi kontribui ativamente ba dezenvolvimentu nasaun no konsolidasaun identidade nasionál ba libertasaun povu no hametin nasaun,” afirma Faustino Cardoso, ohin, iha ámbitu misa selebrasaun aniversáriu CFP nian iha Igreja Santo António, Motaél, Dili.
Misa ba selebrasaun aniversáriu CFP ba da-lima ne’e prezide husi Padre Juvito do Rego ne’ebé organiza husi Ministériu Justisa.
Faustino Cardoso hatete, hasa’e dezempeñamentu no prestasaun serbisu iha kna’ar lorloron importante hodi serve públiku tuir orientasaun konstituisaun katak Timor-Leste Estadu Ida Demokrátiku hodi fó valór ba prinsípiu luta ba libertasaun nasaun no povu ninia moris di’ak.
“Ita mós halo empeñu no dezempeñu ba ita-nia prestasaun serbisu no knaar atendimentu públiku sira, liuliu liga ho aspirasaun no espetativa hotu públiku tomak no mós liga ba mehi sira ne’ebé mak orienta konstituisaun Estadu Direitu Demokrátiku ida ne’e, nune’e haree ba prinsípiu ho valór sira ne’ebé orienta sustenta hodi luta ba libertasaun ninian,” tenik Faustino Cardoso.
Komemorasaun aniversáriu CFP ne’e mós hanesan oportunidade ida ba servidór públiku atu halo reflesaun hodi projeta planu sira iha futuru atu hadi’a di’ak liu tan administrasaun públiku.
Prezidente KFP ne’e relembra katak, impase polítika ne’ebé akontese iha 2018 afeta ba mudansa polítika, Governasaun, ajustamentu institusionál, maibé CFP konsege ultra pasa situasaun ne’e hodi kontinua fornese atendimentu ba públiku tuir área ida-idak ho di’ak.
Misa selebrasaun ne’e partisipa husi Prezidente Komisaun Nasionál ba Eleisaun (CNE-sigla portugés), Alcino Barris, Reitór Universidade Nasionál Timor Lorosa’e (UNTL), Francisco Miguel Martins, Prezidente Autoridade Munisípiu Dili, Gaspar Soares, reprezentante igreja no família boot funsionáriu públiku ne’ebé serbí iha instituisaun estadu.
Jornalista : Osória A. Marques
Editór : Francisco Simões
