Reprezentante FAO, Paula Lopes da Cruz. Foto/Antónia Gusmão.

DILI, 15 jullu 2019, (TATOLI)-Ajénsia Internasionál Food and Agriculture Organization (FAO) ne’ebé hanesan mós parseiru ba Governu Timor-Leste hodi dezenvolve setór agrikultura apresia Governu tanba iha kompromisu boot tebes hodi deside Sensu Agríkola sai prioridade nasionál ne’ebé mai kedas ho nia pakote finanseiru.

Reprezentante FAO, Paula Lopes da Cruz, hatete hodi FAO nia naran hakarak agradese ba governu tanba ikus mai sei realiza Sensu Agríkola 2019 nian, tanba planu ne’e hahú kedas iha 2007.

“Hanesan parseiru ami haree prosesu ne’e másimu tebetebes, maibé seidauk bele dehan loos ona, mas tun ona ba terrenu no halo ona servisu maka foin haree dehan di’ak no ladi’ak. Mas, ami iha esperansa boot katak sensu ne’e sei susesu no esforsu hotu sei la saugati de’it”, Paula hatete ba jornalista sira hafoin partisipa abertura treinamentu ba treinadór (ToT, sigla inglés) ba Sensu Agríkola 2019, iha Balidi, ohin.

“Ami iha konfiansa boot ba ekipa tékniku Governu nian, tanba sira esperiénsia lubuk ida, liuliu sira hosi Diresaun Jerál Estatístika ne’ebé halo ona Sensu Populasaun ba dala-rua mezmu la uza sistema eletróniku”, Paula hatete ida ne’e relasiona ho ekipamentu ne’ebé sei uza iha sensu ne’e ho sistema eletróniku hotu.

Paula Lopes haktuir, bainhira FAO envolve mós iha Sensu Populasaun iha 2010, FAO konsege konvense Diresaun Jerál Estatístika hodi tau pergunta balu kona-ba agrikultura nian ne’ebé hahú ho pergunta lima, no iha 2015 aumenta pergunta ba sanulu, entaun konsege fó ona dadus interesante balu sobre setór agrikultura maka komesa atrai atensaun hosi Governu hodi tau Sensu Agrikultura sai prioridade iha tinan ne’e.

Reprezentante ne’e afirma, Sensu Agríkola 2019 nu’udar dahuluk ne’ebé realiza iha Timor-Leste no FAO apoia ba programa ne’e.

“Ami apoiu hahú hosi prepara manuál, hahú mós formasaun ba ekipa nasionál, formasaun iha área téknika, dezenvolve kestionáriu no mós dezenvolve programa CAPI dezde tinan 2016 to’o 2019. Maibé, servisu diskusaun atu implementa Sensu Agrikultura iha Timór-Leste ne’e dezde tinan 2007 no iha 2009 iha proposta ida hato’o ba Governu atu hahú maibé tempu ne’ebá governu seidauk fó prioridade entaun la konsege tau orsamentu”, haktuir Paula.

Atu evita irregularidade durante rekolla dadus maka sei utiliza sistema eletróniku hanaran computer assisted personal interviewing (CAPI), ne’ebé atu kontrola ba nesesáriu, nune’e trava erru ne’ebé sei akontese durante rekolla informasaun iha terrenu.

“Ami halo esforsu hotu atu evita irregularidade, baibain ami rekolla dadus uza papél, katak iha surat-tahan  iha pergunta imprime hotu maka fó ba enumeradór sira bá foti, maibé ida ne’e ba dala-uluk halo Sensu Agrikultura no ida ne’e mós primeira vés uza sistema eletróniku katak pergunta hothotu sei tau iha programa ida naran CAPI”.

Reprezentante ne’e salienta, bazeia ba misaun FAO nian maka iha tinan 2019, FAO servisu hamutuk ho Governu liuhusi Ministériu Agrikultura e Peska (MAP) no Ministériu Finansa-Diresaun Jerál Estatístika ba realizasaun Sensu Agríkola dahuluk iha Timór-Leste.

Orsamentu ba realizasaun Sensu Agríkola ne’e ho montante hamutuk millaun $5 ne’ebé tau iha Dotasaun Todo Governu.

Notísia relevante : http://www.tatoli.tl/2019/07/treinador-200-ba-sensu-agrikola-2019-partisipa-tot/

http://www.tatoli.tl/2019/02/sensu-agrikola-2019-realiza-fali-iha-junu-jullu/

Jornalista: Antónia Gusmão 

Editora : Maria Auxiliadora

HAKEREK NO HATÁN

Please enter your comment!
Please enter your name here