Atividade traballadór sira hili kafé iha Kooperativa Kafé Timor (CCT-sigla portugés), Bidau Akadiruhun. Imajen António Goncalves

DILI, 15 jullu 2019 (TATOLI)-Hafoin implementa polítika governu nian ba Rejime Kontributivu Seguransa Sosiál  iha 2016 to’o agora, ema liu rihun 90 husi funsionáriu públiku ho traballadór empreza privadu mak halo ona aplikasaun.

Bazeia ba Dekretu Lei No.12 /2016, 14 de Novembru, hatete, kada traballadór  kontribui 4% no empregadór kontribui 6%,   tanba ne’e kada fulan benefisiáriu rai ona osan  10% ne’ebé mak jere iha Institutu Nasionál Seguransa Sosiál, (INSS), Ministériu Solidariedade Sosiál no Inkluzaun (MSSI).

Prezidente INSS, Longuinhos Armando, ohin,  esplika ba Ajénsia TATOLI, iha nia serbisu fatin, katak, polítika Rejime Kontributivu ne’e ho objetivu atu garante pensaun no subsídiu ba funsionáriu públiku no traballadór iha setór privadu sira  bainhira reforma   tinan 60 ka hetan asidente, lisensa maternidade no seluk tan.

Longuinhos Armando, informa, husi númeru aplikasaun ne’e, porsentu 71  mai husi Ajente Estadu no porsentu 29 husi setór privadu.

INSS kontinua konsulta no sosializa lei ne’e ba  instituisaun estadu no ajénsia autónomu balun hodi aplika tanba to’o ohin balun seidauk halo kontribuisaun ba programa ne’e. Alende ne’e,  Longuinhos Armando tenik, INSS sei serbisu hamutuk ho Sekretáriu Estadu Formasaun Professional no Empregu (SEFOPE) atu sensibiliza lei ne’e ho setór privadu sira atu rejista ona.

Seguransa sosiál nu’udár direitu umanu fundamentál tuir deklarasaun Universál  Direitu Umanu iha artigu 24. Nune’e, Estadu Timor Leste konsagra kedas direitu ida ne’e iha konstituisaun  RDTL artigu 56 ne’ebé iha pontu ida hateten katak sidadaun hotu-hotu iha direitu ba seguransa no asisténsia sosiál tuir lei no kna’ar Estadu nian.

Jornalista :Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here