Avansadu Assalam FC, Edit Sávio (9), hamate hela bola ho ulun hafoin pasa hosi nia kolega maibé defeza Karketu, Filipe Oliveira (4) no Domingos Freitas (5) prepara-án atu hadau. Imajen Tatoli/Hortençio Sanchez

DILI, 14 jullu 2019 (TATOLI)—Ekipa Assalam FC fahe pontu hanesan ho armada Karketu Dili FC tanba impata 2-2 iha jogu kontinuasaun Primeira Divizaun Liga Futeból Amadora (LFA) époka 2019 ne’ebé hala’o iha Estádiu Munisipál Dili, ohin lorokraik.

Maski fahe pontu ho Assalam, ekipa ne’ebé idéntiku ho Matak Malirin ne’e (Karketu) kontinua mantein iha zona dezpromosaun. Enkuantu, Assalam kontinua asegura án iha zona seguru iha tabela klasifikasaun provizória.

Golu Assalam hatama hosi Daniel Adadi (10) iha minutu 17, 43. Enkuantu, golu Karketu nian hatama hosi Rofino Gama (7) iha minutu 12 no Gelvanio Alberto iha minutu 45+1.

Jogu refere dirije hosi árbitru Francisco Pereira, juiz liña Filomeno da Silva, Romário Tety no árbitru rezerva, Elísio Reis.

Hafoin jogu ramata, treinadór Assalam FC, Andi Susanto hateten jogu refere la’o kapa’as maibé nia jogadór mak laduun antisipa bola ho di’ak. “Loloos ohin ne’e ami manán tanba oportunidade barak hodi halo golu maibé jogadór sira laduun antisipa oportunidade ho didi’ak,” Andi haktuir.

Iha sorin seluk, jestór Karketu Dili FC, Mito Simões informa klube esforsu ona mak ne’e maibé seidauk aserta iha rezultadu. Tanba ne’e, nia fiar katak jogu segunda volta sei hadia di’ak liu-tan hodi sees hosi zona mean.

 “Ami nia esforsu mak hanesan ne’e ona. Ha’u fiar ba oin ami sei sai hosi liña mean. Iha jogu segunda volta, ami sei sosa tan jogadór avansadu, médiu no defeza,” dehan Mito. Nia hatutan, sira kontatu ona ho jogadór estranjeiru balun maibé sei iha hela faze negosiasaun no seidauk bele publika sai.

Fó hanoin fali, dadaun ne’e, tabela klasifikasaun provizóriu lidera hosi Lalenok FC ho pontu 13, segundu lugár AS Ponta Leste ho pontu 12, terseiru lugár Boavista Timor FC ho pontu 10, kuartu lugár AD DLB ho pontu 8, kintu lugár Assalam ho pontu 8 (AD SLB no Assalam pontu hanesan maibé diferente golu), sestu lugár Atlético Ultramar ho pontu 6, sétimu lugár Académica FC ho pontu 3 no oitavu lugár Karketu ho pontu 2.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here