DILI, 13 jullu 2019 (TATOLI)-RA’ES Hadomi Timoroan (RHTO) nu’udar organizasaun nasionál ba defisiénsia iha Timor-Leste. Ba tinan ne’e, RHTO iha programa prioridade iha area tolu, kompostu husi area saúde, edukasaun no ekonomia.
RHTO ne’ebé estabelese iha loron 28 Agostu 2016 iha ona nia membru na’in 600 hodi hala’o knar ba ema ho defisiénsia sira iha Munisípiu 12, inklui Rejiaun Administrativu Espesiál Oe-Cusse Ambeno (RAEOA).
Diretór Ezekutivu RA’ES Hadomi Timor Oan (RHTO), Joãozito dos Santos informa, programa seluk tan mak iha área saneamentu, bee moos no mós halo advokasia ba interesse no direitu ema ho defisiénsia sira.
“Programa hirak ne’e, ami hetan fundus husi governu Austrália ne’ebé mak implementa to’o iha munisípiu 12, inklui RAEOA,” informa Joãozito dos Santos ba Ajénsia TATOLI iha nia knaar fatin, Taibessi, Dili, Sesta (12/07/2019).
RHTO halo mós advokasia ba ema ho defisiénsia atu oinsá sira bele iha konsiénsia hodi bele halo partisipasaun másimu iha programa sira, liuliu edukasaun atu sira bele asesu ba edukasaun nune’e bele kapasita aan no partisipa iha dezenvolvimentu maske ho kondisaun defisiénsia.
“Kuandu sira ba edukasaun ne’e, ami fó apoiu iha nivel eskola Primária, Pre-Sekundária to’o Sekundária de’it, maibé atu kontinua ba iha ensinu superior, ida-idak esforsu mesak tanba ami-nia fundus limitadu,” hateten Joãozito.
RHTO mós serbisu hamutuk Governu Timor Leste no parseiru iha setór defisiénsia, sosiedade sivíl, organizasaun públiku no setór privadu atu bele hadi’ak inkluzaun.
Intermus sosiedade inkluziva, esplika Joãozito, oinsá ema ho defisiénsia goza sira-nia direitus umanus tomak, hetan kbiit atu alkansa sira-nia aspirasaun, no partisipa totalmente no iguálmente iha Timor-Leste.
Jornalista : Osória A. Marques
Editór : Francisco Simões
