DILI, 12 jullu 2019 (TATOLI)-Grupu foin sa’e Hatutan hanesan organizasaun ida ne’ebé serbisu hamutuk parseiru sira inklui organizasaun ONU nia ba direitu umanu, ohin, hala’o atividade Marsa Diversidade ba datolu hodi promove identidade LGBTI (Lesbian, Bisexual, Gay, Transjender no Inter-seksu) iha sosiedade.
Marsa ne’e hahú husi Estrada Ministériu Negósiu Estranjeiru no Komunidade (MNEK) to’o iha Sekretaria Estadu Juventude no Desporto (SEJD).
Inocêncio de Jesus Xavier husi Asia Justice and Right (AJAR), konsidera eventu ne’e atu fó hanoin ba joven Timoroan sira atu respeita malu, liuliu maluk LGBTI.
“Komemorasaun ba eventu ne’e hodi manifesta komunidade LGBTI nia identidade no hatudu mós katak LGBTI eziste ona iha Timor Leste,” hateten Inocêncio ba Ajénsia TATOLI.
Hola parte iha marsa ne’e komunidade LGBTI, sosiedade sivíl, membru governu, Provedoria Direitus Umanu no Justisa (PDHJ-sigla portugés) ho mós reprezentante ajénsia korpu diplomátiku sira iha TL.
Jornalista : Osoria A. Marques
Editór : Francisco Simões
