Diretór Administrasaun Planeamentu Finansa LFA, Adolmado Amaral (klaran).

DILI, 12 jullu 2019 (TATOLI)—Jogu Primeira Divizaun Liga Futeból Amadora (LFA) sei hala’o dala haat iha semana ida nia laran nune’e jogu refere bele terminadu lalais tuir kalendáriu jogu.

“Klube sira ezije para jogu ne’e finalizadu iha setembru. Loos. Ami konsidera no Prezidente LFA fó ona orientasaun katak Liga bele orienta jogu iha Estádiu Munisipál Dili hosi kinta to’o domingu nune’e jogu bele terminadu iha setembru. Maibé, desizaun atu utiliza estádiu ne’e kompeténsia Sekretaria Edtadu Juventude no Desportu (SEJD),” tenik Diretór Administrasaun Planeamentu Finansa LFA, Adolmado Amaral, iha edifísiu LFA, Bairru Formosa, Dili, ohin, relasiona ho ezijénsia klube neen ne’ebé hasa’e ona karta ba Sekretaria Estadu Juventude no Desportu no Prezidente LFA hodi lamenta ho desizaun muda kalendáriu jogu.

Diretór ne’e hatutan, parte LFA halo nafatin aprosimasaun ho SEJD nune’e bele hetan orientasaun atu bele utiliza Estádiu Munisipál Dili para bele rezolve ezijénsia klube sira nian.

“Kona-ba ida ne’e, Prezidente Liga fó ona orientasaun maibé Sekretaria Estadu Juventude no Desportu seidauk responte atu utiliza estádiu semana ida dala haat. Kona-ba responsabiliza ba sasán ruma karik jogu hala’o mak aat, Prezidente Liga, Nilton Gusmão prontu atu toma responsabiliza,” Adolmado informa.

Entretantu, nia mós husu ba klube sira atu kompriende basaa Liga ne’ebé la’o ho natureza amadora iha ne’ebé kondisaun infraestrutura mós laduun sufisiente.

Aleinde ne’e, LFA mós planu hela atu halo mudansa ba jogu segunda volta bele realiza iha Maliana no Baucau maibé sei haree mós ba orsamentu.

“Karik SEJD dehan tau nafatin osan rihun $79 para ita dezloka ba munisípiu, entaun ita la’o. Kalendariu loloos mak joga iha munisípiu ne’e. Kestaun tansá muda mai Dili ne’e kestaun orsamentu de’it,” Adolmado esplika.

Nia hatutan, orsamentu hosi SEJD rasik foin mak %40 ne’ebé mak distribui ona ba klube sira. Tanba ne’e mak orsamentu hala’o jogu iha munisípiu menus.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here