Sekretáriu Ezekutivu Komisaun Nasionál Kombate HIV-SIDA, Daniel Marçal

DILI, 12 jullu 2019 (TATOLI)—Komisaun Nasionál Kombate HIV-SIDA hala’o sensibilizasaun informasaun HIV-SIDA iha fatin hotu-hotu, atu hasa’e juventude no komunidade nia koñesimentu ba iha prevensaun no redúz tendénsia transmisaun moras HIV-SIDA.

“Ema barak mak hetan moras HIV-SIDA la’ós ema ida mak haruka no la’ós ema ida mak obriga. Nia mak foti desizaun. Nia mak hakarak rasik. Feto klosan sira barak mak para sira-nia estudu tanba de’it ransu livre,” hateten Sekretáriu Ezekutivu Komisaun Nasionál Kombate HIV-SIDA, Daniel Marçal, bainhira hala’o sensibilizasaun no fahe informasaun kona-ba HIV-SIDA ba joven sira iha Aldeia Terus Nanis, Suku Bairru Pité, Postu Administrativu Don Aleixo, Munisípiu Dili, ohin.

Nia dehan, joven sira la kuidadu-án, futuru joven ne’e sei badak lalais. Tan ne’e, evita ransu livre maibé ransu ne’ebé di’ak sei hetan futuru ne’ebé di’ak iha oin mai.

“Mane agora terus tanba virus HIV-SIDA no mane barak mak sai aman no husik estudu hodi buka serbisu ho idade ne’ebé ki’ik hanesan tinan 14-15,” Daniel haktuir.
Kazu HIV-SIDA ne’ebé Ministériu Saúde konsege rejista hamutuk 931—mate hamutuk 118 hosi joven sira liliu idade 15-25.

Jornalista: Felicidade Ximenes

Editór: Xisto Freitas

HAKEREK NO HATÁN

Please enter your comment!
Please enter your name here