Jogadór tolu (trio) hosi Papua-Indonézia ne'ebé durante ne'e haforsa Karketu Dili FC. Imajen Tatoli/Hortençio Sanchez

DILI, 11 jullu 2019 (TATOLI)—Jestoriál Klube Karketu Dili FC ofisialmente hapara ona kontratu jogadór tolu (trio) hosi Papua-Indonézia ne’ebé durante ne’e haforsa ona armada Matak Malirin ne’e iha jogu kontinuasaun Liga Futeból Amadora (LFA) époka 2019.

Razaun hapara jogadór estranjeiru tolu ne’e tanba la konsege lori Karketu hetan rezultadu ne’ebé di’ak durante jogu. Jogadór tolu ne’e mak hanesan Yance Wenda (94), Naftali Heluka (99) no Melkianus Wakerwa (24).

“Kona-ba jogadór Papua na’in tolu ne’e nia kontratu ami hapara ona iha 30 juñu ne’e, bazeia ba sira-nia kontribuisaun la ajuda klube entaun ami tenke hapara sira, nune’e ami bele buka fali jogadór estranjeiru balun hodi reforsa nafatin Karketu,” tenik Prezidente Karketu, Adilson Ribeiro iha Dili, foin lalais ne’e.

“Treinadór ami mantein nafatin nia. Nia mai kondisaun ami nian hanesan ne’e ona, ne’e duni ami sei la fó todan ba nia. Ami sei hamutuk ho nia atu foti sa’e fali Karketu,” katak Adilson.

Bainhira husik jogadór Papua tolu ne’e, nia informa, Karketu iha ona hanoin atu kontratu fali jogadór estranjeiru foun hodi reforsa ekipa kapitál Dili ne’e iha jogu segunda volta. “Ami iha ona kontatu ho jogadór balun hosi Gana no Indonézia,” nia haktuir.

Maski klube hapara ona kontratu, ho fuan boot, Yance Wenda ba Agência Tatoli iha edifísiu LFA hateten katak nia hakruuk ba desizaun ne’ebé klube haraik ona ba sira. “Ami kumpri saida mak klube foti ona. Ami mai ne’e joga ho fuan no laran. Laiha buat ida. Desizaun hotu iha klube. Karik ami joga ladi’ak mak sira hapara ona ami ne’e,” tenik Yance.

Jogadór tolu ne’e hahú assina kontratu joga iha Karketu iha 30 abríl tinan ne’e no loloos sei termina iha dezembru mai ne’e. “Ami-nia kontratu loloos ne’e termina iha dezembru. Ami-nia saláriu fulan rua simu ona maibé simu seidauk kompletu. Restu klube seidauk selu,” nia haktuir ho oin nakraik.

Kontratu ne’ebé Karketu Dili FC fó ba jogadór na’in tolu ne’e kada fulan jogadór ida simu dolar atus tolu ($300).

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here