DILI, 11 jullu 2019 (TATOLI)—Reprezentante Asosiasaun Marineiru Timor-Leste (AMTL), Galiano da Costa, hatete Estadu Timor-Leste (TL) presiza ratifika konvensaun internasionál ba prevensaun poluisaun hosi ró sira (MARPOL-sigla inglés), nune’e governu iha kbi’it bele kondena kompañia ró sira ne’ebé fakar óliu arbiru iha área tasi TL.

“Kuandu ita iha ona lei Marpol, ita bele kondena kualkér kompañia ró sira ne’ebé mak fakar óliu iha área jurídiku TL nian, tanba lei Marpol iha aneksu II hateten labele fakar óliu iha parte portu ninian”, nia esplika.

Galiano informa risku hosi óliu ne’ebé ró sira fakar arbiru iha tasi laran ne’e sei fó impaktu boot ba ikan no korál sira iha tasi laran. Tanba ne’e, tuir nia, lei Marpol ne’e mosu para proteje ambiente tasi nian hosi hahalok sira ne’e.

Nia salienta iha portu nasaun sira seluk nian, governu fasilita ekipamentu atu deteta óliu sira ne’ebé nakfakar iha tasi laran ne’e mai hosi ne’ebé. Maibé, nia dehan, depois kuandu ninia parte halo observasaun no husu APORTIL, hateten kauza ne’e sira sei identifika liuhusi kámara vijilánsia (CCTV-sigla inglés).

“Ha’u hanoin ne’e difísil liu tanba óliu ne’ebé nakfakar ne’e, oinsá mak CCTV bele deteta. Ekipamentu ida ne’ebé mak ami sujere ne’e bele deteta iha …. (makina) ró nian,” tenik nia iha Portu Dili, ohin.

Nune’e mós, Galiano esklarese loloos ne’e parte APORTIL tenke toma konsiderasaun ba kualkér ró saida de’it mak atu atraka mai iha portu Dili, tenke priénxe ka kompleta buat hotu. Maibé, observasaun ne’ebé mak AMTL halo katak ró kargo New Glory ne’e laiha fasilidade ba planu emerjénsia poluisaun óleu hosi ró (SOPEP-sigla inglés).

Notísia relevante:Óliu Fakar iha Portu Dili Hafo’er Tasi

“Ekipamentu SOPEP kada ró tenke iha. Ninia funsaun atu prevene kuandu mina fakar iha ró ka tasi laran tenke uza ekipamentu ne’e para bele trava mina labele alastra ba fatin seluk. Maibe, tanba sira laiha entaun mina halai arbiru de’it”, nia subliña.

Jornalista: Tomé Amado

Editór: Xisto Freitas

HAKEREK NO HATÁN

Please enter your comment!
Please enter your name here