Ministru Saúde, Bonifácio Maukoli dos Reis. Imajen Egas Cristovão

DILI, 9 jullu 2019 (TATOLI)—Governu liuhosi Ministériu Saúde iha tinan 2017 haruka ona médiku jerál na’in 30 hodi kontinua estudu espesialidade ba área oioin iha Cuba, ho hanoin ida tanba Timor-Leste rasik seidauk iha médiku espesialista barak.

Vise Ministru Dezenvolvimentu Estratéjiku Saúde, Bonifácio Maukoli dos Reis informa, médiku sira kontinua estudu iha Cuba hamutuk na’in 29 maibé na’in ida (1) fila ona tanba problema saúde la permiti no hakarak halo mudansa ba área seluk.

“Nia atu fila tanba kondisaun saúde. Nune’e mós, nia hakarak halo mudansa ba iha espesialidade, maibé ita la autoriza para halo mudansa. Nia konkore iha área ida maibé to’o ikus nia halo mudansa, entaun haruka fila mai Timor–Leste,” nia tenik ba Agência Tatoli iha Palásiu Governu, tersa ne’e.

Tuir governante ne’e, médiku seluk sei nafatin hala’o estudu iha Cuba. Mediku hirak ne’e foti espesialidade iha área kardiolojia, interna, onkolojia no ortopedia.

Antes ne’e, hafoin enkontru ho Primeiru-Ministru, Taur Matan Ruak, Embaixadór Cuba ba Timor-Leste, Oscar Genaro Coet Blackstock ba jornalista sira hateten, nia parte promete Cuba sei kontinua forma médiku timoroan sira hodi fó asistensia saúde ida ne’ebé ho kualidade ba povu Timor-Leste.

Nia dehan, durante ne’e, Cuba konsege forma ona médiku timoroan hamutuk 900, ne’ebé prontu ona atu fó asisténsia saúde ba povu Timor-Leste ho kualidade.

Entretantu, kooperasaun Timor-Leste ho Cuba realiza iha governu dahuluk, ne’ebé antes ne’e iha enkontru entre Prezidente Cuba, Fidel Castro ho Prezidente Timor-Leste, Kay Rala Xanana Gusmão iha Kuala Lumpur, Malázia, tinan 2003.

Jornalista: Felicidade Ximenes

Editór: Xisto Freitas

HAKEREK NO HATÁN

Please enter your comment!
Please enter your name here