Jogadór Lalenok United FC selebra sira-nia vitória hafoin tebe sai Karketu Dili FC hosi Taça 12 Novembro, ohin. Imajen Mídia LFA

DILI, 10 jullu 2019 (TATOLI)—Klube promovidu Primeira Divizaun Liga Futeból Amadora (LFA) époka 2019, Lalenok United FC, konsege ultrapasa ba kuartu finál hafoin tebe sai armada Karketu Dili FC ho golu 3-1 iha jogu kontinuasaun Taça 12 de Novembro ne’ebé hala’o iha Estádiu Munisipál Dili, ohin lorokraik.

Hosi vitória ne’ebé Lalenok gaña, lori ekipa refere sei hasoru malu ho klube estimadu hosi Munisípiu Manatuto, Atlético Ultramar iha kuarta finál.

Golu vitória hosi Lalenok prodúz hosi Ismael Adams iha minutu 35, 42 no Elias Mesquita iha minutu 82. Enkuantu, golu úniku Karketu nian hatama hosi Osvaldo Belo iha minutu 76.

Hafoin jogu ramata, treinadór Lalenok Yance Matmey, hateten nia sente kontente tanba bele manán tan Karketu. “Ha’u sente kontente tebes tanba ohin bele manán tan karketu. Ohin ne’e ami laiha objetivu atu manán tanba ami nia foku liu-ba Liga maibé ohin manán ha’u agradese,” tenik Yance.

Iha sorin seluk, treinadór Karketu, Haryadi Hengkang, sente triste ho rezultadu ne’ebé nia ekipa hetan. “Sente triste maibé ha’u kontinua esforsu nafatin oinsá atu bele manán jogu sira tuir mai Liga nian,” dehan Haryadi.

Hosi rezultadu ne’e, Karketu tenke sai hosi jogu Taça 12 de Novembro tanba jogu refere uza sistema bota fora (sistem gugur-termu Indonézia).

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here